تحرك مفاجيء للدولار.. العملة الأمريكية تكسب أرضا جديدة
هو ليه الدولار متمسك بمستوى فوق 52 جنيه؟ .. وهل تحركات الأموال الساخنة بقت العامل الأهم في سوق الصرف؟ .. وإيه اللي بيحصل في السوق مع استمرار دخول وخروج الاستثمارات الأجنبية من أدوات الدين المصرية؟
الدولار واصل مكاسبه، واستقر فوق مستوى 52 جنيه في البنوك المصرية .. وسط تحركات حذرة في تدفقات الأموال الساخنة المرتبطة بأدوات الدين الحكومية.
والحكاية هنا مش مجرد حركة يومية في سعر الصرف .. لأن المستثمر الأجنبي لما يدخل أدوات الدين المصرية بيحتاج يحول عملته للدولار أو الجنيه وفقا لاتجاه الاستثمار .. ولما يخرج من السوق ممكن يزيد الطلب على العملة الأجنبية ..
والفترة الأخيرة شهدت بالفعل تحركات متقلبة في استثمارات الأجانب .. لكن في نفس الوقت ما زالت أدوات الدين المصرية جاذبة بسبب فارق العائد الكبير مقارنة بالأسواق العالمية.
فأسعار الفائدة في مصر ما زالت عند مستويات مرتفعة .. البنك المركزي مثبت سعر الإيداع عند 19 في المية وسعر الإقراض عند 20 في المية .. بينما سجلت بعض عوائد أذون الخزانة مستويات تتجاوز 25 في المية.
وده بيخلي السوق المصري محتفظ بجاذبيته أمام المستثمرين الأجانب .. لكن في المقابل أي تغير في سعر الصرف أو الفائدة العالمية أو التوترات الجيوسياسية ممكن يغير اتجاه التدفقات بسرعة.
وبحسب أحدث البيانات المنشورة .. سجل الدولار في البنك المركزي حوالي 52.22 جنيه للشراء و52.36 جنيه للبيع .. بينما سجل في البنك الأهلي وبنك مصر 52.24 جنيه للشراء و52.34 جنيه للبيع.
وخد بالك الدولار فوق 52 جنيه مش مجرد رقم في شاشات البنوك .. لكنه انعكاس لحركة سوق بتتأثر بتدفقات الاستثمار الأجنبي وبالعائد على أدوات الدين وبالتطورات العالمية في نفس الوقت.
