مليار جنيه في الطريق.. تحرك حكومي لإعادة تشغيل آلاف المصانع
هو إيه اللي بيحصل في المصانع المتعثرة في مصر؟ وهل مليار جنيه يقدروا يرجعوا مصانع مقفولة للإنتاج من جديد؟ وليه الحكومة اختارت تدخل برأس المال بدل ما تكتفي بالدعم التقليدي؟
مصر أطلقت صندوق لإعادة هيكلة المصانع المتعثرة برأسمال مليار جنيه .. بهدف إعادة تشغيل المصانع والكيانات الصناعية القابلة للحياة والمساهمة في رؤوس أموال المنشآت اللي عندها مقومات تشغيل حقيقية لكنها محتاجة إعادة هيكلة.
الفكرة هنا مش مجرد ضخ فلوس في مصانع متوقفة .. لكن تقييم كل مصنع ومعرفة سبب التعثر الأول .. هل المشكلة تمويلية ولا فنية ولا إدارية .. وبعد كده تحديد الطريقة المناسبة لإعادته للإنتاج.
والصندوق هيشتغل كمان على استعادة الطاقات الإنتاجية غير المستغلة .. وده معناه زيادة الإنتاج وخلق فرص عمل جديدة وتقوية سلاسل التوريد المحلية .. وبالتالي رفع قدرة الصناعة المصرية على المنافسة.
الصندوق بييجي في وقت وزارة الصناعة بتعمل حصر شامل للمصانع المتعثرة في مختلف المحافظات .. خاصة إن تقديرات الوزارة بتشير لوجود حوالي 6 آلاف مصنع متعثر.
والتحرك الحالي امتداد لفكرة كانت الحكومة أعلنت عنها في سبتمبر 2025 لإنشاء صندوق استثماري بالتعاون مع البنوك لإعادة هيكلة وتشغيل المصانع المتعثرة ماليا .. لكن المبادرة وقتها ما دخلتش حيز التنفيذ.
والاختلاف دلوقتي إن المنظومة الجديدة بتعتمد على تقييم المصانع بشكل متخصص .. وبعد التقييم يتم تحديد هل المصنع محتاج تمويل وإعادة هيكلة .. ولا ربطه بمستثمر .. ولا تدخل من صناديق الاستثمار.
والهدف النهائي هو تحويل المصانع المتوقفة من عبء اقتصادي إلى طاقات إنتاجية تشتغل من جديد وتضيف للاقتصاد بدل ما تفضل أصول معطلة.
