الدهب بيقع بقوة.. إيه اللي حصل وهل الهبوط لسه مستمر؟

الدهب دخل في موجة هبوط قوية جدًا، وخسر أكتر من 3%، ووصل لأدنى مستوياته في أكتر من 7 أسابيع.. لكن السؤال الأهم: ليه الدهب بيهبط؟ وهل النزول ده ممكن يكمل؟

أول سبب هو الدولار، لأن لما العملة الأمريكية بتقوى، الذهب المقوم بالدولار بيبقى أغلى على المستثمرين اللي بيتعاملوا بعملات تانية، وبالتالي الطلب عليه ممكن يتراجع.

السبب التاني هو ارتفاع عوائد السندات الأمريكية، وده بيخلي المستثمر يقارن بين الذهب اللي مبيحققش عائد دوري، وبين أدوات بتقدم عوائد مع ارتفاع الفائدة.

أما العامل التالت، فهو قفزة أسعار النفط بحوالي 3%، وده رجع مخاوف التضخم، وبالتالي ممكن يخلي الفائدة تفضل مرتفعة لفترة أطول.

طيب هل الذهب هيكمل هبوط؟
ده هيتوقف بشكل كبير على البيانات الاقتصادية الأمريكية، خصوصًا الوظائف والتضخم، لأنها هتحدد توقعات السوق للفائدة.. وبالتالي الدهب لسه تحت الضغط، والبيانات الجاية هتكون حاسمة.