دخلت الرقم السري غلط 3 مرات؟.. اعرف إمتى ماكينة الـATM تاخد الكارت بتاعك

لو الكارت البنكي بتاعك اتسحب جوه ماكينة الـATM ومطلعش، متقلقش، لأن ده ممكن يحصل لأسباب أمنية أو فنية، وفي خطوات مهمة لازم تعملها فورًا.

من أشهر الأسباب إنك تدخل الرقم السري غلط 3 مرات متتالية، أو تكون البطاقة منتهية الصلاحية أو متوقفة من البنك. كمان لو اتأخرت في سحب الكارت بعد انتهاء العملية، الماكينة ممكن تحتجزه، وغالبًا المهلة بتكون من 15 لـ30 ثانية.

ولو الكارت متبلغ عنه كمفقود أو مسروق، ممكن الماكينة تسحبه تلقائيًا، بالإضافة لاحتمال وجود عطل فني أو انقطاع كهرباء أو اتصال بالشبكة.

في الحالة دي، استنى دقيقة أو دقيقتين قدام الماكينة، ومتستخدمش أي أدوات لإخراج الكارت. واتصل فورًا بخدمة عملاء البنك، وسجل مكان الماكينة ورقمها ووقت الواقعة.

ولو الماكينة جوه فرع وفي مواعيد العمل، ممكن تسترده بإثبات ملكيتك. أما لو ماكينة خارجية أو تابعة لبنك تاني، غالبًا هتحتاج تطلب بدل فاقد من بنكك.