مصر هتصنع 15 مليون موبايل.. قفزة ضخمة في الإنتاج المحلي خلال 2026

لو بتفكر تشتري موبايل جديد، فالصناعة المحلية في مصر داخلة على قفزة كبيرة جدًا.

وزير الاتصالات المهندس رأفت هندي أعلن أن إنتاج الموبايلات في مصر ارتفع من 3 ملايين جهاز سنة 2024 لـ10 ملايين جهاز في 2025، والمستهدف خلال 2026 يوصل لـ14 أو 15 مليون موبايل.

والرقم ده ممكن يغطي معظم احتياجات السوق المحلي، اللي بتتراوح بين 18 و20 مليون جهاز سنويًا، مع التوجه كمان للتصدير.

ومش بس صناعة الموبايلات، وزارة الاتصالات بتوسع برامج التدريب الرقمي لتأهيل الشباب لسوق العمل، وكمان بتدعم تطبيقات مصرية بالذكاء الاصطناعي زي «كرنك شات» و«بالمصري» و«لغات».

أما «مصر الرقمية»، فتم إتاحة حوالي 245 خدمة عليها، والمستهدف يتجاوز عددها 400 خدمة بحلول 2030.

وكمان الوزارة شغالة على تطوير الألياف الضوئية، وإطلاق استراتيجية لمراكز البيانات قبل نهاية السنة، مع استمرار التركيز على الأمن السيبراني وحماية البنية التحتية الرقمية.