الطماطم ولعت تاني.. الكيلو وصل لـ30 جنيه! إيه اللي حصل؟

بعد ما أسعار الطماطم هديت.. رجعت تاني تضرب في الأسواق، والكيلو وصل لـ30 جنيه.

طب إيه اللي حصل؟
السبب الأساسي هو تراجع المعروض في الأسواق، مع نهاية العروة الصيفية، وقبل دخول العروة الجديدة "الخريفية" بكميات كبيرة.

لكن الموضوع مش بس حكاية عروات..
موجة الحر وارتفاع درجات الحرارة أثرت على المحصول، وسببت ضعف التزهير وعقد الثمار، وكمان زادت فرص انتشار الأمراض، وبالتالي الإنتاج اتأثر والمعروض قل.

وفي نفس الوقت، تراجع عدد من مزارعي الطماطم عن زراعتها بعد خسائر متتالية في مواسم سابقة، مع ارتفاع تكاليف الزراعة.

وده كله جه في توقيت حصل فيه فاصل بين العروات، فالكميات اللي بتوصل للأسواق قلت، والأسعار بدأت تطلع.

والتوقعات مش مطمئنة.. لأن نقيب الفلاحين حذر من استمرار الارتفاع، مع إمكانية وصول الكيلو للمستهلك لحوالي 40 جنيه مع بداية أكتوبر.

يعني الطماطم مش ناقصة في مصر، لكن المشكلة في توقيت الإنتاج والمعروض.