بطيخ سكاتا المصري مطلوب عالميًا.. سر الإقبال الدولي على محصول بيتزرع في مناطق محددة
مش أي بطيخ ينفع للتصدير.. وبطيخ سكاتا المصري بقى عليه طلب من أسواق بره.
الصنف ده بيزرع بشكل خاص في مناطق زي القنطرة غرب والقصاصين وفايد وشرق قناة السويس، وده بسبب طبيعة الأراضي الرملية الجيدة الصرف، اللي بتساعد على إنتاج ثمار بجودة عالية.
لكن إيه اللي مخلي سكاتا مطلوب؟
أول حاجة الطعم والحلاوة.. البطيخ بيتميز بلب أحمر متماسك ودرجة حلاوة عالية، مع شكل متجانس وأحجام مناسبة للتداول والتصدير.
كمان انتظام شكل الثمرة وجودة القشرة بيساعدوا في الفرز والتعبئة والنقل، ودي مواصفات مهمة جدًا للمستوردين.
والميزة الأكبر إن مصر عندها ظروف مناخية بتسمح بإنتاج البطيخ في توقيتات تساعد على توفيره للأسواق الخارجية، خصوصًا وقت ما المعروض من بعض الدول المنافسة بيكون أقل.
ومصر أصلًا بتنتج حوالي 1.5 مليون طن بطيخ سنويًا، وبيتم تصدير جزء منه للأسواق الخارجية، مع زيادة الاهتمام بالأصناف ذات المواصفات التصديرية.
يعني الموضوع مش مجرد "بطيخة مسكرة".. ده محصول مصري بمواصفات بتخليه ينافس على أسواق خارجية.
