إيطاليا حاطة 23 مليار دولار في مصر.. و1400 شركة بتكشف حجم الشراكة
إيطاليا مش بس شريك لمصر في مشروعات الطاقة.. دي واحدة من أكبر الدول المستثمرة في السوق المصري.
الأرقام بتكشف حجم الشراكة الحقيقية.. 23.4 مليار دولار استثمارات إيطالية في مصر خلال الفترة من 2004/2005 وحتى 2024/2025.
والأهم إن الاستثمارات دي مش جاية من كام شركة وخلاص.. لأ، فيه حوالي 1400 شركة ومساهمة إيطالية بتشتغل في السوق المصري.
وده بيخلي إيطاليا في المرتبة الرابعة بين أكبر المستثمرين الأجانب في مصر.
لكن القاهرة مش عايزة تكتفي بالأرقام دي.. بالعكس، فيه تحرك عشان الاستثمارات الإيطالية تزيد أكتر خلال الفترة الجاية، خصوصًا في قطاعات زي الصناعات الغذائية، والغزل والنسيج، والهيدروجين الأخضر والطاقة النظيفة.
وكمان التعاون مش استثمارات بس.. حجم التبادل التجاري بين مصر وإيطاليا وصل لحوالي 5.9 مليار يورو خلال 2025.
يعني العلاقات الاقتصادية بين البلدين بتدخل مرحلة جديدة، ومصر بتحاول تستغل وجود الشركات الإيطالية عشان تزود التصنيع والصادرات وتفتح أسواق جديدة.
واللافت كمان إن الجانب الإيطالي شايف مصر شريك محوري في منطقة المتوسط وأفريقيا، خصوصًا مع موقع مصر وقدرتها على الوصول للأسواق الأفريقية.
فهل الـ23.4 مليار دولار دول مجرد رقم كبير؟ ولا إحنا قدام شراكة اقتصادية أكبر بكتير جاية بين مصر وإيطاليا؟
