الكشكول يبدأ من 20 جنيه.. أسعار مستلزمات المدارس في معرض «أهلا مدارس»

لو لسه بتجهز لأولادك للمدرسة، وعايز تعرف أسعار الأدوات والمستلزمات، معرض «أهلًا مدارس» في الطالبية ممكن يوفرلك اختيارات كتير وبأسعار مختلفة.

المعرض موجود بأرض المطاحن في شارع الملك فيصل، وبيضم أدوات مدرسية من مكتبات وشركات مختلفة، عشان كل أسرة تختار حسب احتياجاتها وميزانيتها.

دستة الكشاكيل، اللي فيها 10 كراسات، بتبدأ من 70 وتوصل لـ120 جنيه للكشكول الـ60 ورقة، بينما الكشكول السلك الـ100 ورقة من 20 لـ55 جنيه.

أما دستة الكراسات الـ10، فأسعارها من 40 لـ75 جنيه، ودستة الأقلام الرصاص الـ12 قلم بتبدأ من 35 جنيه.

المقلمة أسعارها من 50 لـ250 جنيه، والزمزمية من 45 لـ150 جنيه.

واللانش بوكس من 40 لـ200 جنيه، أما الألوان فبتبدأ من 15 وتوصل لـ150 جنيه حسب النوع والحجم.

والمعرض مستمر لحد 25 سبتمبر، يوميًا من 11 الصبح لحد منتصف الليل، وفيه تخفيضات بتوصل لـ25% على بعض المنتجات.