إيجار عادي ولا تمليكي؟.. 5 فروق لازم تعرفهم قبل ما تختار شقة الإسكان 2026
إيجار عادي ولا إيجار تمليكي؟.. لو بتفكر تقدم على شقق الإسكان 2026، لازم تعرف الفرق قبل ما تختار.
أول فرق هو الجهة المسؤولة عن الطرح.. الإيجار العادي بيطرحه صندوق الإسكان الاجتماعي، بينما الإيجار التمليكي بيكون من خلال هيئة المجتمعات العمرانية.
تاني فرق هو التملك.. في الإيجار العادي بتنتفع بالشقة خلال مدة العقد من غير ما تمتلكها، لكن في الإيجار التمليكي عندك فرصة تشتري الوحدة بعد انتهاء فترة الإيجار وفقًا للقواعد المحددة.
تالت فرق هو مدة العقد.. الإيجار العادي مدته 3 سنين وقابل للتجديد مرة واحدة، يعني إجمالي 6 سنين، بينما الإيجار التمليكي مدته 6 سنين وبعدها تقدر تتجه للتملك.
رابع فرق في طريقة حساب المبلغ.. في الإيجار العادي القيمة الإيجارية بتتحدد بما يعادل 25% من دخل المتقدم، أما في الإيجار التمليكي فالمبالغ اللي دفعتها خلال فترة الإيجار بتدخل في حساب تكلفة التملك.
وخامس فرق هو الهدف.. لو محتاج سكن لفترة محددة وبقيمة تناسب دخلك، الإيجار العادي ممكن يكون أنسب.. لكن لو هدفك الاستقرار والتملك في النهاية، الإيجار التمليكي هو الاختيار الأقوى.
يعني قبل ما تقدم.. حدد الأول: إنت عايز تسكن بس، ولا عايز الشقة تبقى ملكك في النهاية؟
