الجمارك هتبقى أسهل؟.. 17 دليل جديد لتبسيط الإجراءات وتسهيل تعاملات المستثمرين ومجتمع الأعمال
لو بتتعامل مع الجمارك وبتحس أن الإجراءات معقدة أو مش واضحة.. فيه خطوة جديدة ممكن تفرق معاك.
وزير المالية أحمد كجوك أكد أن الدولة شغالة على تبسيط المفاهيم والإجراءات الجمركية، وتوحيد طريقة التعامل، علشان تسهّل على المستثمرين ومجتمع الأعمال.
والجديد أن مصلحة الجمارك أصدرت 17 دليلًا استرشاديًا مطورًا، الهدف منها شرح القواعد والإجراءات بشكل أبسط وأوضح، وكمان رفع الوعي الجمركي عند العاملين والمستثمرين.
والأدلة دي هتكون متاحة ورقيًا وإلكترونيًا، علشان أي مستثمر يقدر يرجع للمعلومة بسهولة وفي أي وقت.
أما رئيس مصلحة الجمارك أحمد أموي، فأوضح أن الأدلة بتشرح وتوحد إجراءات مهمة زي التخليص المسبق، والمنافيست، والأسواق الحرة، والمشغل الاقتصادي، والمستودعات الجمركية، والسماح المؤقت.
يعني من الآخر، الهدف أن الجمارك تبقى أوضح، والإجراءات أسرع، وحركة التجارة والاستثمار أسهل.
