لو اتنصب عليك في تحويل بنكي أو إلكتروني.. تتحرك إزاي؟
لو حولت فلوس لشخص واكتشفت بعدها إنك اتنصبت...الوقت هنا مهم جدًا.. متستناش لحد ما المحتال يقفل موبايله ويختفي.. وأول خطوة لازم تعملها انك تتواصل فورًا مع البنك أو الجهة اللي نفذت من خلالها التحويل وبلغهم إن العملية محل احتيال وقدم كل تفاصيلها زي رقم العملية المبلغ وقت التحويل وبيانات المستفيد... أي معلومة عندك احتفظ بيها.
ولو التحويل تم من خلال خدمة إلكترونية احتفظ كمان بالمحادثات أو الإيصالات أو أي دليل مرتبط بالواقعة.. ومتدخلش في مفاوضات طويلة مع الشخص اللي نصب عليك ومتبعثلوش فلوس تانية بحجة إنه «هيرجعلك المبلغ».. دي من أخطر الحركات.. وكمان متديش لأي شخص بيانات الدخول أو الرقم السري أو رمز التحقق بحجة إنه هيسترجعلك فلوسك.
ولو الموضوع فيه شبهة احتيال، اتبع كمان الإجراءات الرسمية المطلوبة للإبلاغ عن الواقعة.. وخلي بالك من نقطة مهمة.. الإبلاغ مش معناه ضمان رجوع الفلوس لكن التحرك السريع بيخلي عندك فرصة أفضل لاتخاذ الإجراءات المناسبة وتتبع العملية حسب حالتها. يعني لو اتنصب عليك... متسكتش، ومتستناش... اتحرك فورًا.
