مفاجأة لأصحاب المخابز.. قرار جديد يضمن توافر العيش المدعم
هو العيش المدعم ممكن يتأثر بسبب الإجازات؟.. السؤال ده كان مطروح بعد مشاكل حصلت الأسبوع اللي فات في صرف الدقيق للمخابز... لكن دلوقتي فيه حل جديد.
شعبة المخابز اجتمعت مع وزارة التموين لمناقشة مشاكل منظومة صرف الدقيق، وكان من أهم اللي اتفقوا عليه إن الدقيق المدعم للمخابز هيتم صرفه بشكل آجل عن أيام العطلات الرسمية، وكمان يومي الجمعة والسبت.
والفكرة ببساطة إن الإجازة ما تبقاش سبب في تعطيل صرف الدقيق أو توقف المخابز عن الإنتاج.
والأهم للمواطن إن تكلفة إنتاج الخبز عن أجولة الدقيق دي بتتحملها وزارة التموين، وبتدفعها للمخابز... يعني المواطن مش هيتحمل التكلفة دي.
وده معناه إن منظومة العيش المدعم مستمرة، والشعبة أكدت استقرارها في كل المحافظات، وطمأنت المواطنين إن إنتاج الخبز هينتظم وتوافره مش هيتأثر.
وكمان أكدت إن أي تغييرات مرتقبة في شكل منظومة الدعم مش هتأثر على إمدادات السلع الأساسية.
يعني من الاخر... مشكلة صرف الدقيق في الإجازات كان لازم يبقى ليها حل، والحل المطروح دلوقتي هو إن المخابز تاخد احتياجاتها من الدقيق بنظام آجل عن أيام الإجازات.
