160 جنيه زيادة في سعر الجرام.. ليلة صعبة في سوق الدهب
الـ6000 جنيه اللي الذهب فضل محبوس تحتها لشهرين تقريبًا... اتكسرت.. واللي حصل الأسبوع اللي فات ممكن يكون مجرد بداية لحركة أكبر في أسعار الدهب بمصر.
الذهب ارتفع خلال تداولات الأسبوع الماضي بنسبة 2.7%، وكسب حوالي 160 جنيه للجرام.
وبكده وصل لأعلى مستوى في 7 أسابيع، وسجل 6100 جنيه للجرام، بعدما كان بدأ الأسبوع عند 5935 جنيه.
لكن الأهم مش الزيادة نفسها.. الأهم إن الدهب قدر يعمل حاجة كان بيحاول يعملها من فترة.. كسر منطقة التداولات العرضية اللي كانت مسيطرة على السوق تحت مستوى 6000 جنيه للجرام.
يعني إيه الكلام ده؟ ببساطة... الذهب كان بيتحرك في نطاق محدود لفترة طويلة، لا قادر يطلع بشكل واضح، ولا بينزل بعيد.
لكن الأسبوع اللي فات، حصلت الحركة اللي السوق كان مستنيها
الذهب جمع زخم كفاية و اخترق مستوى الـ6000، والأهم إنه قفل الأسبوع فوق المستوى ده.
وده فنيًا بيفتح الباب لاحتمال استمرار الصعود خلال الفترة الجاية.
طب إيه اللي حرك الذهب بالشكل ده؟
السبب الرئيسي، بحسب التحليل الفني لمنصة جولد بيليون، هو القفزة الكبيرة في سعر أونصة الذهب عالميًا.
ودي نقطة مهمة جدًا.. لأن سعر الأونصة العالمية بيدخل بشكل مباشر في تسعير الذهب داخل مصر.
فبالتالي، أي تحرك قوي في الذهب عالميًا ممكن ينعكس على السعر المحلي.
دلوقتي الذهب واقف عند 6100 جنيه للجرام بعد ما كسر حاجز الـ6000.
والسؤال اللي السوق كله هيراقبه الفترة الجاية.. هل الـ6000 جنيه بقت دعم جديد للدهب؟ ولا الدهب هيرجع يختبرها من تاني؟
