خطة الـ250 مليار.. مصر الجديدة للإسكان تراهن بقوة على مشروع هليوبوليس الجديدة
إيه سر الرهان الكبير على هليوبوليس الجديدة؟، وهل المدينة فعلاً هتدخل 250 مليار جنيه؟، وليه الشركة بقت تعتمد على الشراكة مع المطورين؟، وإيه حكاية مشروع "جادينا"؟، وإزاي "القصبة الخضراء" هتغير شكل المدينة؟، وهل هليوبوليس الجديدة هتبقى منافس قوي للعاصمة الإدارية؟
مدينة هليوبوليس الجديدة بقت دلوقتي الورقة الرابحة لشركة مصر الجديدة للإسكان، واللي الشركة بتراهن عليها علشان تحقق طفرة ضخمة في الإيرادات خلال السنين الجاية، الأرقام اللي اتكلمت عنها الشركة مش قليلة، لأنها بتستهدف إيرادات تتجاوز 250 مليار جنيه، بالإضافة لشراكات استثمارية مضمونة بأكتر من 112 مليار جنيه خلال عامين بس.
لكن السؤال هنا... إزاي مدينة واحدة هتجيب الأرقام دي؟.. الشركة بقت تعتمد بشكل كبير على نظام الشراكة مع كبار المطورين العقاريين، وده بيمثل حوالي 70% من مشروعاتها، بينما 30% بس بتنفذه بنفسها، الفكرة أن الشراكات دي بتقلل المخاطر، وفي نفس الوقت بتسرع تنفيذ المشروعات وتحقق عائد أكبر.
الشركة كمان نجحت خلال آخر 3 سنين إنها تتعاقد على تطوير حوالي 2500 فدان داخل هليوبوليس الجديدة، ولسه عندها حوالي 700 فدان جاهزين للتطوير، غير 1450 فدان احتياطي للتوسع في المستقبل، وده معناه أن المدينة لسه قدامها مراحل نمو ضخمة.
ومن أهم الحاجات اللي عملتها الشركة إنها صرفت حوالي مليار جنيه على البنية التحتية، من طرق ومرافق ومياه وغاز واتصالات، علشان المدينة تكون جاهزة لاستقبال استثمارات وسكان أكتر.
وفي نفس الوقت الشركة شغالة على مشروع "جادينا"، باستثمارات حوالي 2.5 مليار جنيه، وهيضم مئات الوحدات السكنية مع مناطق تجارية وإدارية وخدمات متكاملة.
وده مش المشروع الوحيد، لأن في سبتمبر الجاي هيتم إطلاق مشروع "القصبة الخضراء"، واللي هيضم منطقة تجارية وترفيهية، وساحة كبيرة، وفندق، ومركز ديني، علشان المدينة تتحول لمجتمع متكامل مش مجرد عمارات سكنية.
الشركة كمان متوقعة إن أرباحها تزيد حوالي 30% خلال 2026 و2027، ومع دخول 2028 بتتوقع قفزة أكبر ممكن توصل لـ10 مليارات جنيه أرباح إضافية.
كل الخطوات دي بتوضح أن شركة مصر الجديدة للإسكان مش بتبيع أراضي وخلاص، لكنها بتحاول تحول كل متر عندها لمشروع يحقق قيمة حقيقية، ويجذب استثمارات، ويوفر فرص عمل، ويرفع قيمة المدينة بالكامل.
ولو الخطة دي نجحت، هليوبوليس الجديدة ممكن تبقى واحدة من أهم المدن الاستثمارية والعمرانية في مصر خلال السنوات المقبلة.
