لو معاك عداد كودي.. 6 أخطاء بيخلصوا الرصيد من غير ما تحس

لو عندك عداد كودي أو مسبق الدفع، فيه عادات بسيطة ممكن تكون السبب أن الرصيد يخلص بسرعة من غير ما تاخد بالك. أول حاجة، متسيبش الأجهزة على وضع الاستعداد بالريموت، وافصلها من الفيشة، لأنها بتسحب كهربا طول الوقت.

كمان متسيبش شواحن الموبايل أو اللابتوب في الكهرباء وهي فاضية، لأنها برضه بتستهلك طاقة، ولو بتشغل التكييف، خليه على 24 أو 25 درجة، لأن كل درجة أقل بتزود الاستهلاك.

السخان الكهربائي شغله قبل الاستخدام بنص ساعة بس، ومتسيبوش شغال طول اليوم، وبالنسبة للثلاجة، متفتحش الباب كتير وسيب وراها مساحة للتهوية.

ولو لسه عندك لمبات عادية، غيرها بـلمبات ليد لأنها بتوفر لحد 80% من الكهرباء.

وأهم نصيحة، تابع شاشة العداد باستمرار، وحاول تشحن في أول الشهر علشان تبدأ من الشريحة الأولى وتوفر في الاستهلاك من البداية.