مشروع هيغير مستقبل الكهرباء والطاقة في مصر.. قيمته هتعدي الـ 13 مليار جنيه

هو ليه مصر بتستثمر 253 مليون دولار في أكبر خط كهرباء ؟ زمين الشركات اللي كسبت سباق تنفيذ أكبر مشروع لنقل الكهرباء في مصر وإيه أهميته؟ والأهم من كل ده إيه المكسب الحقيقي اللي هيعود على مصر من المشروع ده؟ وهل فعلا هيقربنا من هدف إن مصر تبقى مركز إقليمي للطاقة؟

في الوقت اللي العالم كله بيتجه فيه للطاقة النظيفة مصر بتتحرك بخطوات أسرع بعد إعلان فوز 4 شركات وتحالفات عالمية ومحلية بتنفيذ أكبر خط لنقل الكهرباء في مصر بجهد 500 كيلوفولت والمشروع ده مش مجرد خط كهرباء عادي لكنه شريان جديد هينقل الكهرباء المنتجة من مشروع طاقة الرياح العملاق اللي بتطوره شركة سكاتك النرويجية بقدرة 900 ميغاواط وده واحد من أكبر مشروعات الطاقة المتجددة اللي بتتنفذ في مصر خلال السنوات الأخيرة.

قيمة المشروع وصلت إلى حوالي 13 مليار جنيه بما يعادل 253.4 مليون دولار وده بيكشف حجم الاستثمار اللي الدولة بتضخه علشان تجهز البنية التحتية لاستقبال كميات أكبر من الكهرباء المنتجة من الرياح والطاقة الشمسية لأن إنتاج الكهرباء لوحده مش كفاية لازم يكون فيه شبكة قوية قادرة تنقل الطاقة دي للمستهلكين بكفاءة ومن غير فاقد.

طيب مين الشركات اللي فازت بتنفيذ المشروع؟

المناقصة انتهت بفوز مجموعة الخرافي ناشيونال الكويتية وشركتي وادي النيل والجوهري المصريتين بالإضافة إلى تحالف ذكي السويدي والعربية الأفريقية للإنشاءات والمفاجأة إن مجموعة الخرافي والتحالف الأخير حصلوا على أكثر من 60 بالمئة من إجمالي قيمة المناقصة وده معناه إن الجزء الأكبر من التنفيذ هيكون من نصيبهم بعد منافسة قوية بين عدد كبير من الشركات.

طيب المشروع ده هيتنفذ في قد إيه؟

الخطة الحالية بتقول إن تنفيذ أكبر خط لنقل الكهرباء في مصر هيستغرق حوالي سنة واحدة من تاريخ بدء الأعمال وده يعتبر جدول زمني سريع جدا بالنسبة لمشروع بالحجم ده خاصة إنه بيتضمن إنشاء بنية تحتية ضخمة بجهد 500 كيلوفولت وهو أعلى مستويات الجهد المستخدمة في نقل الكهرباء داخل الشبكة القومية.

ومين اللي هيدفع تكلفة المشروع؟

التمويل هيكون بالكامل من موازنة الدولة ووزارة المالية هتتحمل التكلفة باعتباره واحد من المشروعات الاستراتيجية اللي بتخدم الاقتصاد المصري على المدى الطويل وفي الوقت الحالي الشركة المصرية لنقل الكهرباء بتتفاوض مع الشركات الفائزة على التفاصيل النهائية للعقود تمهيدا لاعتمادها من مجلس الإدارة وتوقيعها خلال شهر سبتمبر.

طيب ليه الدولة بتستثمر المبلغ الكبير ده؟

ببساطة مصر بتوسع إنتاجها من الكهرباء النظيفة بشكل غير مسبوق وكل محطة رياح أو طاقة شمسية جديدة محتاجة شبكة نقل قادرة تستوعب الإنتاج وتوصله لكل المحافظات وبدون تطوير الشبكة أي استثمارات في الطاقة المتجددة هتكون قيمتها أقل بكتير لأن الكهرباء مش هتوصل بالشكل المطلوب.

وده جزء من خطة أكبر بكتير هدفها تحويل مصر إلى مركز إقليمي للطاقة سواء في الكهرباء أو الغاز الطبيعي لأن الدولة مش بتفكر في تلبية احتياجات السوق المحلي بس لكنها كمان بتخطط لتصدير الكهرباء لدول المنطقة وأوروبا.

والمشروع الجديد مش هيشتغل لوحده لكنه جزء من منظومة ضخمة بتنفذها مصر حاليا لأن فيه مشروع الربط الكهربائي مع السعودية بقدرة 3000 ميغاواط على مرحلتين وفيه خطط للربط مع اليونان وقبرص لنقل الكهرباء المنتجة من الطاقة المتجددة إلى أوروبا.

وكمان الدولة شغالة على مشروع جديد لتصدير الكهرباء إلى العراق وسوريا ولبنان من خلال كابل بحري مع الأردن بقدرة أولية 2000 ميغاواط بالإضافة إلى تطوير خطوط الربط الحالية مع ليبيا والسودان والأردن لزيادة قدرتها التشغيلية.

وده كله معناه إن المشروع الجديد أكبر من مجرد خط لنقل الكهرباء لأنه حلقة أساسية في خطة طويلة المدى هدفها إن مصر تتحول من دولة بتنتج الكهرباء للاستهلاك المحلي فقط إلى دولة بتصدر الطاقة وتحقق منها عوائد اقتصادية كبيرة وتجذب استثمارات جديدة في قطاع الطاقة المتجددة وكل خطوة في تطوير الشبكة القومية بتقرب مصر أكتر من الهدف ده وتفتح الباب أمام مشروعات أكبر خلال السنوات المقبلة.