تقلبات جديدة تضرب الدولار.. حركة مفاجئة تربك الحسابات

يا ترى ليه الدولار طلع ليه تاني رغم إن احتياطي مصر في أعلى مستوى في التاريخ؟ والأموال الساخنة بتضغط على الجنيه إزاي؟ وايه اللي هيحصل في سوق صرف العملات الأجنبية الايام الجاية ؟

الدولار رجع يتحرك من جديد والجنيه دخل مرحلة جديدة من التقلبات والسؤال اللي بيدور في ذهن كل واحد دلوقتي هو ليه الدولار لسه محافظ على مستواه فوق 51 جنيه رغم إن مصر عندها أعلى احتياطي نقدي في تاريخها وهل اللي بيحصل ده مجرد موجة مؤقتة ولا بداية اتجاه جديد في سوق الصرف وهل خروج الأموال الساخنة هو السبب الحقيقي ولا فيه عوامل تانية بتلعب دور أكبر في تحريك سعر الدولار.

اللي حصل في بداية الأسبوع إن الدولار ماخدش اتجاه واحد في كل البنوك لكنه شهد حالة من التذبذب فارتفع في بنوك وتراجع بشكل محدود في بنوك تانية لكن في النهاية فضل محافظ على وجوده فوق مستوى 51 جنيه في أغلب البنوك وده معناه إن السوق لسه تحت ضغط واضح بسبب استمرار خروج جزء من استثمارات الأجانب من أدوات الدين الحكومية للأسبوع التاني على التوالي.

ولو بصينا على الأسعار هنلاقي إن أعلى سعر للدولار اتسجل في بنوك أبوظبي الإسلامي وقناة السويس ونكست عند 51.38 جنيه للشراء و51.48 جنيه للبيع بينما أقل سعر كان في بنك الإمارات دبي الوطني عند 50.40 جنيه للشراء و50.50 جنيه للبيع أما في بنوك التجاري الدولي وكريدي أغريكول والمصري الخليجي والتعمير والإسكان والمصرف المتحد والعربي الأفريقي فسجل الدولار 51.30 جنيه للشراء و51.40 جنيه للبيع وفي البنك الأهلي المصري وبنك مصر والمصرف العربي وصل إلى 51.29 جنيه للشراء و51.39 جنيه للبيع بينما سجل البنك المركزي 51.28 جنيه للشراء و51.42 جنيه للبيع.

طيب إيه حكاية الأموال الساخنة وليه كل شوية نسمع إنها السبب في حركة الدولار؟

الأموال الساخنة هي استثمارات أجنبية بتدخل السوق المصري علشان تستفيد من العائد المرتفع على أدوات الدين الحكومية زي أذون وسندات الخزانة لكنها في نفس الوقت بتكون سريعة الخروج أول ما يحصل أي توتر سياسي أو اقتصادي أو المستثمر يحس إن فيه فرصة أفضل في دولة تانية وعلشان كده اسمها أموال ساخنة لأنها بتتحرك بسرعة كبيرة.

وده اللي حصل بالفعل خلال الأسبوع الماضي لأن تعاملات العرب والأجانب في السوق الثانوية للدين الحكومي سجلت صافي بيع بقيمة 459.2 مليون دولار لكن لو بصينا بالتفصيل هنلاقي إن الأسبوع كله كان مليان تقلبات ففي يوم الأحد سجلت التدفقات صافي شراء 6.85 مليون دولار وبعدها حصل بيع بقيمة 37.1 مليون دولار يوم الاثنين وقفز البيع يوم الثلاثاء إلى 442.4 مليون دولار قبل ما ترجع التدفقات الإيجابية بشكل محدود يوم الأربعاء بصافي شراء 13.5 مليون دولار.

والأسبوع اللي قبله كان أصعب لأن مصر شهدت خروج أموال ساخنة بقيمة 1.46 مليار دولار مع تجدد التوترات في الشرق الأوسط وده خلق ضغط واضح على الجنيه ورفع الطلب على الدولار.

لكن هل الصورة كلها سلبيات؟

لا طبعا..  لأن فيه فرق كبير بين التحركات اليومية للأموال الساخنة وبين المؤشرات الأساسية للاقتصاد المصري والدليل إن شهر يونيو لوحده سجل صافي شراء في السوق الثانوية للدين الحكومي بقيمة 8.76 مليار دولار بينما سجل الربع الثاني من 2026 صافي تدفقات داخلة بقيمة 11.66 مليار دولار وده معناه إن المستثمرين الأجانب لسه موجودين لكن تحركاتهم بقت أكثر حساسية لأي أحداث خارجية.

كمان فيه نقطة مهمة جدا وهي إن البنك المركزي أعلن وصول الاحتياطي النقدي الأجنبي إلى 55.07 مليار دولار بنهاية يونيو بزيادة 1.93 مليار دولار عن مايو وده أعلى مستوى في تاريخ مصر وارتفاع الاحتياطي بالشكل ده بيدي البنك المركزي قوة أكبر في التعامل مع أي ضغوط على سوق الصرف وبيطمن الأسواق إن الدولة عندها موارد كافية من العملة الأجنبية.