أسعار الموبايلات رايحة على فين؟ تحذير جديد للسوق
لو ناوي تشتري موبايل جديد، يمكن يكون الوقت المناسب دلوقتي، لأن الأسعار مرشحة ترتفع تاني. رئيس شعبة تجار المحمول بالجيزة أكد أن قرار شركة آبل برفع أسعار بعض أجهزتها عالميًا ممكن يوصل تأثيره للسوق المصري خلال الفترة الجاية.
وقال إن الزيادات بدأت أصلًا من شركات كتير قبل آبل، بسبب ارتفاع أسعار مكونات التصنيع، خصوصًا الرامات، وكمان زيادة تكاليف الشحن.
الأخطر أن الموبايلات الاقتصادية بقت مهددة إنها تختفي تدريجيًا بسبب الغلاء المستمر، التجار كمان أكدوا أنهم بيتعرضوا لغضب الزبائن رغم إنهم مالهمش علاقة بتحديد الأسعار، لأن الشركات والوكلاء هما اللي بيحددوا التسعير.
ومع ضعف القوة الشرائية، السوق بقى مش مستحمل أي زيادات جديدة، وفيه موزعين ممكن يخرجوا من السوق بسبب ارتفاع الإيجارات والرواتب والمصاريف.
عشان كده، فيه مطالب للشركات إنها تعيد النظر في سياسة التسعير وتحافظ على استقرار السوق، قبل ما الغلاء يضرب المبيعات أكتر، ويأثر على الجميع.
