اعرف مخالفات عربيتك وإدفعها من البيت
لو عندك عربية ولسه بتروح المرور عشان تعرف مخالفاتك، فأنت بتتعب نفسك على الفاضي. دلوقتي وزارة الداخلية وفرت خدمة الاستعلام ودفع المخالفات أونلاين في دقائق ومن غير زحمة.
كل اللي عليك تدخل على بوابة المرور أو بوابة مصر الرقمية، وتكتب رقم العربية أو بيانات الرخصة، وهتظهرلك كل المخالفات المسجلة. ولو حبيت تدفع، تقدر تدخل على موقع النيابة العامة، وتختار الدفع الإلكتروني، وبعدها تسدد بالفيزا أو الماستر كارد، أو حتى تدفع كاش من البريد أو البنك.
كمان لازم تعرف أن فيه مخالفات ينفع تتظلم عليها، زي السرعة أو استخدام الموبايل أثناء السواقة، وفيه مخالفات تانية مفيش فيها تظلم، زي القيادة برخصة منتهية أو التلاعب بلوحات العربية.
الخدمة دي وفرت وقت ومجهود كبير على أصحاب العربيات، وخلت كل الإجراءات أسهل وأسرع، قبل ما تتحرك بعربيتك، افتح موبايلك الأول، واعرف موقف مخالفاتك في أقل من دقيقة، عشان تتجنب أي مفاجآت أو غرامات إضافية بعد كده.
