بشرى للعمالة غير المنتظمة.. 3000 جنيه في انتظارك: اعرف هتصرفهم إمتى وإزاي؟
الجمعة 17/يوليو/2026 - 03:00 ص
لو اسمك مسجل ضمن العمالة غير المنتظمة... من بكرة الساعة 12 الظهر، هتقدر تستلم 3000 جنيه دفعة واحدة.. من غير تعقيدات، وببطاقة الرقم القومي بس.
وزارة العمل أعلنت إن صرف الدفعتين التانية والتالتة من المنحة الاستثنائية للعمالة غير المنتظمة، من خلال مكاتب البريد المنتشرة في كل المحافظات.
كل مستفيد هيصرف 3000 جنيه، بواقع 1500 جنيه لكل منحة، باستخدام بطاقة الرقم القومي فقط.
إجمالي المبلغ اللي هيتم صرفه وصل إلى 737 مليون و715 ألف جنيه، لصالح 245 ألفًا و905 عمال مسجلين في قاعدة بيانات الوزارة، في 27 محافظة.
الوزارة أكدت إن الصرف بييجي تنفيذًا لتوجيهات الرئيس عبد الفتاح السيسي، ضمن حزمة الحماية الاجتماعية المخصصة للعمالة غير المنتظمة.
ولو اسمك ضمن المستفيدين، تقدر تتوجه لأقرب مكتب بريد من الساعة 12 ظهرًا ومعاك بطاقة الرقم القومي، وتصرف المنحة مباشرة.
