صدمة جاية؟.. رئيس إيني يتوقع انفجار أسعار البترول في 2027

النفط ممكن يدخل مرحلة مختلفة تمامًا خلال الشهور الجاية، وده حسب توقعات رئيس شركة إيني الإيطالية، اللي قال إن أسعار البترول مش هتفضل مستقرة، وممكن تبدأ تقفز مع بداية 2027 بسبب استمرار التوترات في الشرق الأوسط.

الراجل أكد أن السحب من الاحتياطي الاستراتيجي ساعد يهدّي الأسعار مؤقتًا، لكن المخزون مش هيكفي للأبد، ومع انخفاض الاحتياطيات العالمية يوم بعد يوم، الأزمة ممكن تكبر. 

كمان أوضح أن الحرب والتوترات عطلت الإمدادات، وده خلى المخزونات تنخفض بمعدلات كبيرة، علشان كده طالب الدول إنها تعتمد على مصادر جديدة للنفط بعيدًا عن الشرق الأوسط، زي شمال أفريقيا وأفريقيا وأمريكا اللاتينية وجنوب شرق آسيا. 

والمفاجأة إنه ربط كمان بين أزمة الطاقة والذكاء الاصطناعي، لأن مراكز البيانات الجديدة بتستهلك كهرباء ضخمة، وده بيزود الضغط على سوق الطاقة كله.
ولو السيناريو ده حصل، العالم ممكن يشوف تضخم أعلى، وأسعار طاقة أغلى، وتأثير مباشر على الاقتصاد العالمي خلال الفترة المقبلة.