مشروع هيغير قواعد اللعبة.. مصر تستعد لإنتاج كميات ضخمة من الدهب
في قلب الصحراء الشرقية فيه مشروع ممكن يغير خريطة التعدين في مصر خلال السنوات الجاية.. لكن ليه الدولة بتراهن عليه؟ وليه الشركات العالمية مهتمة بيه؟ وهل فعلا مصر داخلة مرحلة جديدة في إنتاج الدهب؟
لما هيئة الثروة المعدنية والصناعات التعدينية أعلنت إن مشروع دهب أبو مروات هيبدأ الإنتاج الفعلي خلال 2027 الخبر ماكانش بس إعلان عن منجم جديد لكنه كان رسالة إن مصر مستمرة في تنفيذ خطة أكبر هدفها تحويل قطاع التعدين لأحد أهم مصادر الدخل وجذب الاستثمارات الأجنبية.
والسؤال هنا ليه مشروع أبو مروات واخد كل الاهتمام ده ؟
سؤال مهم .. وده لأنه واحد من أهم مشروعات الدهب الواعدة في الصحراء الشرقية واللي بتضم واحدة من أغنى المناطق بالثروات المعدنية في مصر.
طيب مشروع أبو مروات موجود فين وليه المكان ده مهم ؟
المشروع موجود في منطقة الدرع العربي النوبي بالصحراء الشرقية وهي منطقة معروفة عالميا إنها من أغنى المناطق بالذهب والمعادن وبتضم تكوينات جيولوجية جذبت شركات تعدين عالمية من سنين طويلة وده اللي خلى المشروع يتنفذ من خلال شراكة بين هيئة الثروة المعدنية والصناعات التعدينية وشركة آتون ريسورسز الكندية والامتياز بتاع المشروع بيمتد على مساحة أكتر من 57 كيلومتر مربع وده بيدي فرصة كبيرة لاكتشافات جديدة مع استمرار أعمال البحث والاستكشاف.
وليه الإنتاج مش هيبدأ غير في 2027؟
لأن مشروعات التعدين الكبيرة بتمر بمراحل طويلة قبل التشغيل الفعلي تبدأ بالاستكشاف وبعدها الدراسات الفنية والاقتصادية ثم تقييم الأثر البيئي والاجتماعي وبعدها تجهيز البنية الأساسية وإنشاء المصنع والمرافق وكل ده علشان المشروع يشتغل بأعلى كفاءة ومن غير تأثير سلبي على البيئة أو المجتمع المحلي وده اللي حصل بالفعل بعدما عقدت شركة مناجم ذهب أبو مروات جلسة العرض والمناقشة العامة لدراسة تقييم الأثر البيئي والاجتماعي بحضور ممثلين من وزارة البترول والثروة المعدنية والهيئة وجهاز شؤون البيئة ومحافظتي البحر الأحمر وقنا وخبراء التعدين والبيئة وأعضاء من مجلس النواب وممثلين عن المجتمع المحلي.
نيجي لسؤال مهم .. ليه الدولة مهتمة بدراسة الأثر البيئي بالشكل ده؟
لأن العالم كله بقى بيتجه لفكرة التعدين المستدام يعني استخراج الثروات الطبيعية مع الحفاظ على البيئة وتقليل استهلاك الموارد الطبيعية وده اللي المشروع أكد إنه هيطبقه من خلال إعادة استخدام مياه التشغيل بنسبة 100 واستخدام أحدث تقنيات التعدين الصديقة للبيئة وتنفيذ منظومة متكاملة لإدارة النفايات مع الالتزام الكامل بمعايير الصحة والسلامة وبرامج المسؤولية المجتمعية لتنمية المناطق المحيطة بالمشروع.
طيب المشروع ده هيضيف إيه للاقتصاد المصري؟
أول حاجة هيزود إنتاج الدهب المحلي وده معناه زيادة قيمة الثروات المعدنية اللي بتدخل الاقتصاد المصري تاني حاجة هيبعت رسالة قوية للمستثمرين إن مصر بقت جاهزة لاستقبال استثمارات تعدين ضخمة خصوصا بعد تطوير القوانين واللوائح المنظمة للقطاع وثالث حاجة إنه هيوفر فرص عمل مباشرة وغير مباشرة سواء أثناء الإنشاء أو بعد بدء التشغيل وده هيكون له تأثير إيجابي على محافظتي البحر الأحمر وقنا من خلال زيادة النشاط الاقتصادي والخدمات المرتبطة بالمشروع.
طيب هل مشروع واحد يقدر يجذب استثمارات جديدة؟
أيوه طبعا.. لأن المستثمرين العالميين دايما بيبصوا على قصص النجاح ولما مشروع كبير يبدأ الإنتاج ويحقق نتائج إيجابية ده بيشجع شركات تانية تدخل السوق المصري وتبدأ البحث عن فرص جديدة خصوصا إن مصر عندها إمكانيات تعدين ضخمة لسه جزء كبير منها ما تمش استغلاله بالشكل الكامل.
طيب إيه أهمية الشراكة مع شركة كندية في المشروع؟
لأن شركات التعدين العالمية بتمتلك خبرات كبيرة في أعمال البحث والاستكشاف والتشغيل وكمان عندها التكنولوجيا الحديثة اللي بتساعد على استخراج المعادن بكفاءة أعلى وتكلفة أقل وبالتالي وجود شريك دولي بيدي المشروع قوة أكبر وبيزود ثقة المستثمرين في قطاع التعدين المصري.
كمان المشروع مش هدفه استخراج الذهب وبس لكنه جزء من خطة أوسع لتنويع مصادر الدخل القومي وتقليل الاعتماد على القطاعات التقليدية وزيادة مساهمة التعدين في الناتج المحلي خاصة مع ارتفاع الطلب العالمي على الذهب والمعادن في السنوات الأخيرة وده بيفتح فرصة كبيرة قدام مصر إنها تستفيد من ثرواتها الطبيعية بشكل أكبر.
