مصر تقترب من تشغيل أول محطة نووية.. تفاصيل تركيب أهم مكونات مفاعل الضبعة

يعني إيه وعاء ضغط المفاعل؟ وليه تركيبه حدث مهم؟، وإمتى أول مفاعل في الضبعة هيبدأ يشتغل؟، وهل الكهرباء النووية أرخص من الكهرباء التقليدية؟، وإزاي المحطة هتوفر 7 مليارات متر مكعب غاز كل سنة؟، وليه مصر اختارت التعاون مع روسيا في المشروع؟

تخيل أن مصر بقت على بعد خطوة واحدة من تشغيل أول محطة كهرباء نووية في تاريخها... لكن إيه اللي بيحصل دلوقتي في الضبعة؟.. الحقيقة أن مشروع محطة الضبعة دخل مرحلة تعتبر من أهم المراحل في عمره كله، وهي تركيب وعاء ضغط المفاعل للوحدة النووية التانية، ودي قطعة عملاقة بتعتبر قلب المفاعل النووي، ومن غيرها المحطة ما تقدرش تشتغل.

يمكن ناس كتير تسمع اسم "وعاء ضغط المفاعل" ومتفهمش أهميته، لكن ببساطة هو الجزء اللي بيحتوي الوقود النووي، وبتتم داخله عملية إنتاج الحرارة اللي بعد كده بتتحول لكهرباء، علشان كده تركيبه معناه إن المشروع بقى بيتحرك بخطوات ثابتة ناحية التشغيل الفعلي.

لكن السؤال.. ليه محطة الضبعة مهمة أصلًا؟، لأنها أول محطة نووية لإنتاج الكهرباء في تاريخ مصر، ومش مجرد محطة واحدة، لكنها هتضم 4 مفاعلات نووية، قدرة كل مفاعل 1200 ميجاوات، بإجمالي 4800 ميجاوات.. ولما المفاعلات الأربعة يشتغلوا بالكامل، المحطة هتنتج حوالي 35 مليار كيلووات/ساعة كهرباء كل سنة، وده رقم ضخم جدًا، لأنه هيغطي حوالي 12% من احتياجات مصر المتوقعة من الكهرباء بحلول 2030.

طيب إيه فايدة ده للمواطن؟.. أول فايدة إن وجود مصدر جديد ومستقر للكهرباء معناه دعم الشبكة القومية، وتقليل الضغط على محطات الكهرباء اللي بتشتغل بالغاز الطبيعي، كمان محطة الضبعة محطة الضبعة هتوفر على مصر حوالي 7 مليارات متر مكعب من الغاز الطبيعي كل سنة، لأن الكهرباء اللي كانت بتتولد بحرق الغاز، هيتم إنتاجها بالطاقة النووية بدلًا منه، وده معناه أن الغاز اللي هيتوفر ممكن يتصدر، أو يستخدم في الصناعة، أو يوجه لقطاعات تانية تحقق عائد اقتصادي أكبر.

طب هل الطاقة النووية آمنة؟.. المفاعل اللي هيشتغل في الضبعة من أحدث المفاعلات في العالم، وهو من طراز VVER-1200، وبيحتوي على أنظمة أمان متطورة جدًا، مصممة للتعامل مع أي ظروف طارئة وفق المعايير الدولية.. كمان المشروع بيتنفذ بالتعاون مع شركة روساتوم الروسية، وهي واحدة من أكبر الشركات العالمية في مجال الطاقة النووية.

ومصر مش بس اشترت التكنولوجيا، لكنها كمان بتدرب كوادر مصرية علشان تدير المحطة بنفسها، وده معناه نقل خبرة وتكنولوجيا متقدمة للأجيال الجديدة.

وعلشان كده الدولة بدأت تنفيذ مشروع خط كهرباء فائق الجهد بقدرة 500 كيلوفولت، بطول حوالي 128 كيلومترًا، وتكلفة تقارب 4.5 مليار جنيه، علشان ينقل الكهرباء من الضبعة مباشرة للشبكة القومية، ومن المتوقع الانتهاء من الخط خلال عام 2027، بالتزامن مع تقدم أعمال المحطة.

كمان قبل كده، الحكومة وقعت رسميًا اتفاق شراء الوقود النووي، وده كان خطوة مهمة جدًا، لأن المحطة مش هتشتغل من غير الوقود اللازم لتشغيل المفاعلات.