لو عندك عداد كودي.. التحويل للقانوني بدأ رسميًا

لو عندك عداد كهرباء كودي، ففي خبر مهم لازم تعرفه.. وزارة الكهرباء بدأت رسميًا إجراءات تحويل العدادات الكودية إلى عدادات قانونية، بعد الانتهاء من التصالح في مخالفات البناء.

شركات توزيع الكهرباء بدأت بالفعل تبعت رسائل نصية للمواطنين اللي استوفوا شروط التصالح، علشان يبدأوا إجراءات التحويل وتقنين أوضاعهم.

الخطة بتشمل أكتر من مليون و100 ألف عداد، منهم حوالي 950 ألف عداد لمباني تم التصالح عليها، و150 ألف عداد في مباني غير مخالفة، وهيتم تحويلها مباشرة.

ولو هتقدم، هتحتاج عقد ملكية أو إيجار، وبطاقة الرقم القومي، وشهادة التصالح، وآخر إيصال شحن للعداد، مع أي مستندات إضافية تطلبها شركة الكهرباء.

بعد تقديم الملف، الشركة هتراجع البيانات الفنية، وبعدها يتم تحويل العداد الكودي إلى عداد قانوني باسم صاحب الوحدة.

الخطوة دي هتضمن تقنين وضع الكهرباء، وتسهل أي معاملات مستقبلية مرتبطة بالعقار أو المرافق، وتحافظ على حقوق المشترك بالكامل.