150 مليون دولار لمصر.. تمويل جديد علشان تركب طاقة شمسية في 20 مصنع
إيه اللي هيكسبه المصنع لما يركب محطة طاقة شمسية؟، وهل الطاقة الشمسية هتقلل أسعار الإنتاج فعلًا؟، وليه الحكومة بدأت بـ20 مصنع الأول؟، وإيه مبادرة "شمس الصناعة" وإزاي هتغير شكل المصانع؟، وهل المشروع ده هيخلق صناعات وفرص شغل جديدة؟
تخيل أن المصنع بدل ما يعتمد على الكهرباء التقليدية، يبقى عنده محطة طاقة شمسية فوق السطح، تولد جزء كبير من احتياجاته، وتقلل فاتورة الكهرباء كل شهر، ده بالضبط اللي الحكومة بدأت تتحرك تنفذه على أرض الواقع.
مصر أعلنت عن خطوة جديدة في ملف الطاقة النظيفة، من خلال تنفيذ مبادرة لتركيب محطات طاقة شمسية بقدرة إجمالية 200 ميجاوات فوق أسطح حوالي 20 منشأة صناعية مملوكة للدولة، بدعم مالي بيصل إلى 150 مليون دولار.
الهدف الأساسي من المشروع هو تقليل تكاليف التشغيل على المصانع، وزيادة الاعتماد على الطاقة النظيفة، وتقليل استهلاك مصادر الطاقة التقليدية.. المبادرة دي تمت مناقشتها خلال اجتماع بين وزير الصناعة وبرنامج الأمم المتحدة الإنمائي، واللي بيشارك في تنفيذها بالتعاون مع عدد كبير من الوزارات، منها الصناعة والكهرباء والبيئة والمالية والخارجية، بالإضافة إلى مركز تحديث الصناعة.
طيب... ليه الحكومة مركزة على الطاقة الشمسية؟.. لأن الكهرباء بتمثل جزء كبير من تكلفة الإنتاج داخل أي مصنع، وكل ما المصنع يقدر ينتج جزء من احتياجاته بنفسه، كل ما تكلفة الإنتاج تقل، وبالتالي المنتج المصري يبقى أكثر قدرة على المنافسة داخل السوق المحلي أو في التصدير.
المبادرة الجديدة كمان هتتنفذ من خلال نظام "منتج الطاقة المستقل"، يعني هيتم إنشاء وتشغيل محطات الطاقة بطريقة تضمن استدامة التشغيل من غير ما المصنع يتحمل أعباء كبيرة في البداية.
لكن الأهم أن المشروع ده مش النهاية، ده مجرد البداية، لأن وزارة الصناعة شغالة في نفس الوقت على مبادرة أكبر اسمها "شمس الصناعة"، واللي بتستهدف تركيب محطات طاقة شمسية فوق أسطح حوالي 7 آلاف مصنع في مختلف المحافظات، بإجمالي قدرة توصل إلى 1000 ميجاوات خلال عامين فقط.
وده معناه أن آلاف المصانع ممكن خلال الفترة الجاية تعتمد على الطاقة الشمسية بشكل جزئي أو كامل، وده هيخفف الضغط على الشبكة القومية للكهرباء، ويوفر مليارات الجنيهات على القطاع الصناعي.
كمان الحكومة مش بتفكر في إنتاج الكهرباء بس، لكنها عايزة توطن صناعة مستلزمات محطات الطاقة الشمسية نفسها، يعني تصنيع الهياكل، والكابلات، والمكونات المختلفة داخل مصر، وده هيرفع نسبة المكون المحلي ويفتح الباب قدام استثمارات وصناعات جديدة.
وبرنامج الأمم المتحدة الإنمائي أكد أن المبادرة دي هتساعد مصر تحقق أهدافها في التنمية المستدامة، وتقليل الانبعاثات الكربونية، ورفع تنافسية الصناعة المصرية عالميًا.
