مصر تغير قواعد اللعبة في الدهب.. علامة تجارية عالمية وأبواب جديدة للصادرات

إزاي مصر ممكن تبقى مركز إقليمي لصناعة الدهب مش مجرد سوق لبيعه؟ وإيه اللي هيخلي المشغولات الذهبية المصرية تنافس في أوروبا والخليج وإفريقيا؟  وليه الدولة بقت مركزة دلوقتي على تصدير المنتج المصنع بدل السبائك والمواد الخام؟ وهل ده ممكن يدخل لمصر مليارات الدولارات ويوفر فرص شغل أكتر؟  

أي اقتصاد بيستفيد أكتر لما يصدر منتج مصنع مش مادة خام لأن قيمة المنتج المصنع أعلى بكتير وبتحقق عائد أكبر من النقد الأجنبي وبتخلق فرص شغل أكتر وبتفتح الباب قدام صناعات وخدمات مرتبطة بيه وده بالضبط اللي بتستهدفه الاستراتيجية الجديدة اللي أعلنت عنها لجنة التصدير بشعبة صناعة المعادن الثمينة والمجوهرات باتحاد الصناعات واللي هدفها تحويل مصر لمركز إقليمي لصناعة وتجارة وتصدير الدهب والمشغولات الذهبية خلال الفترة من 2026 لحد 2029.

طيب يعني إيه مركز إقليمي لصناعة الدهب؟

ببساطة معناه إن مصر متبقاش مجرد دولة عندها مصانع بتنتج للسوق المحلي لكن تبقى نقطة رئيسية بيطلع منها الدهب المصنع لأسواق كتير في المنطقة والعالم ومع الوقت تتحول لوجهة للشركات والمستوردين والتجار اللي بيدوروا على منتجات بجودة عالية وسعر منافس وده يرفع حجم الصادرات ويزود دخول الدولار للاقتصاد المصري.

طب هتعمل ده إزاي؟

الخطة الجديدة معتمدة على فكرة واضحة وهي إن نسبة أكبر من الدهب اللي بيتصدر تبقى في صورة مشغولات ذهبية مصنعة داخل مصر بدل ما يكون سبائك أو خام لأن كل مرحلة تصنيع بتضيف قيمة جديدة للمنتج وكل قيمة مضافة معناها عائد أكبر للمصانع وللاقتصاد وللدولة.

طيب هل الخطة دي كلام على الورق  ولا فيها خطوات محددة؟

الحقيقة إن فيه خريطة طريق واضحة جدا فيها 5 محاور رئيسية أول محور هو دراسة الأسواق اللي مصر عايزة تدخلها وعمل قاعدة بيانات كاملة عن احتياجات كل سوق سواء من ناحية التصميمات أو المواصفات أو شروط الاعتماد وده معناه إن كل مصنع هيبقى عارف السوق اللي بيستهدفه محتاج إيه قبل ما يبدأ الإنتاج ودي نقطة مهمة جدا لأنها بتقلل المخاطر وبتزود فرص النجاح.

المحور التاني بيركز على الابتكار لأن المنافسة في سوق الدهب النهارده مش بالسعر وبس لكن كمان بالشكل والتصميم والهوية عشان كده الخطة بتشجع المصانع على تطوير التصميمات واستخدام التكنولوجيا الحديثة في الإنتاج مع زيادة برامج التدريب للعاملين عشان المنتج المصري يقدر ينافس أكبر العلامات التجارية في العالم.

طيب الأسواق المستهدفة فين؟

الاستراتيجية حددت 3 مناطق رئيسية وهي إفريقيا ودول الخليج وأوروبا ودي أسواق فيها طلب كبير على المشغولات الذهبية وكمان مصر عندها ميزة مهمة وهي اتفاقيات التجارة الحرة مع عدد كبير من الدول وده بيسهل دخول المنتجات المصرية ويخليها أكثر قدرة على المنافسة مقارنة بدول تانية.

طيب إزاي الشركات المصرية هتوصل للأسواق دي؟

الخطة مش معتمدة على الانتظار لكن فيها برنامج كامل لدعم مشاركة الشركات في المعارض الدولية وتنظيم بعثات تجارية خارج مصر وكمان استقبال كبار المستوردين العالميين عشان يشوفوا المصانع المصرية على الطبيعة ويتعرفوا على قدراتها الإنتاجية وده بيفتح الباب لعقود تصدير جديدة ويزود فرص انتشار المنتج المصري.

فيه كمان سؤال مهم وهو هل الاستفادة هتكون للشركات الكبيرة بس؟

والإجابة لا لأن واحد من أهم أهداف الاستراتيجية هو مساعدة الشركات الصغيرة والمتوسطة تدخل مجال التصدير لأول مرة وده هيتم من خلال تقديم دعم فني وتسويقي ومساعدتها تحقق كل الاشتراطات المطلوبة في الأسواق الخارجية وده معناه إن عدد أكبر من المصانع هيشارك في التصدير وهيكون عنده فرصة يحقق نمو ويوفر فرص عمل جديدة.