الأتوبيس الترددي وصل فين؟.. اعرف المحطات اللي شغالة دلوقتي

مشروع الأتوبيس الترددي السريع BRT بيواصل التوسع على الطريق الدائري، ومع تشغيل محطات جديدة بدأ عدد كبير من المواطنين يدوروا على خريطة المحطات والمسار الحالي للمشروع.

حاليًا المسار اللي دخل الخدمة بيضم محطة طريق الإسكندرية الزراعي كنقطة انطلاق، مرورًا بمحطة أكاديمية الشرطة، ثم محطة المشير طنطاوي، وأخيرًا محطة الجولف بالقاهرة الجديدة، واللي تعتبر أحدث محطة تم تشغيلها.

أهمية المحطات الجديدة مش بس في نقل الركاب، لكن كمان في الربط بين وسائل النقل المختلفة، خصوصًا أن محطة المشير طنطاوي بقت نقطة تكامل مهمة مع مونوريل شرق القاهرة، بالإضافة لربطها بالتجمع الثالث ومحور المشير.

أما محطة الجولف فبتخدم مناطق القاهرة الجديدة ومرتبطة بمحور جمال عبد الناصر وشارع التسعين الجنوبي.

فكرة المشروع أساسًا قائمة على تخصيص حارة مستقلة للأتوبيسات بعيدًا عن الزحام، وده بيساعد على تقليل زمن الرحلات وتوفير وسيلة نقل أسرع وأكثر أمانًا.

الهدف النهائي أن المشروع يقلل الاعتماد على السيارات الخاصة، ويخفف التكدسات المرورية، ويوفر استهلاك الوقود، ويقدم شبكة نقل جماعي حديثة تخدم ملايين المواطنين يوميًا.