خطوة كبيرة في الطاقة النظيفة.. “ساني الصينية” تنشئ أول مصنع لتوربينات الرياح في مصر

هو ليه مصر قررت تصنع توربينات الرياح محليًا دلوقتي؟، وإيه المكاسب اللي هترجع على الاقتصاد من المصنع الجديد؟، وهل فعلًا هنقدر نستغنى عن استيراد جزء كبير من المعدات؟، وإزاي مشروع واحد ممكن يوفر ملايين الدولارات على الدولة؟، وليه شركة صينية عالمية اختارت مصر بالتحديد للمشروع ده؟، وهل مصر بقت جاهزة تبقى مركز إقليمي لصناعة الطاقة المتجددة؟

مصر أعلنت عن خطوة جديدة ومهمة جدًا في ملف الطاقة المتجددة، لكن المرة دي الموضوع مش مجرد محطة كهربا جديدة أو مزرعة رياح وخلاص.. المرة دي بنتكلم عن أول مصنع لتصنيع توربينات الرياح داخل مصر.

السؤال هنا.. ليه الخبر ده مهم؟ وإيه الفرق بين إننا نستورد التوربينات وإننا نصنعها بنفسنا؟.. الحكاية بدأت بعد توقيع مذكرة تفاهم بحضور الدكتور مصطفى مدبولي رئيس الوزراء، بين شركة "ساني" الصينية، اللي تعتبر من أكبر الشركات العالمية في تكنولوجيا توربينات الرياح، وبين الشركة المصرية لنقل الكهرباء وهيئة الطاقة الجديدة والمتجددة.

الاتفاق مش بس لإنشاء مصنع، لكنه كمان بيشمل تنفيذ مشروع ضخم لإنتاج الكهرباء من طاقة الرياح بقدرة 2000 ميجاوات في منطقة شمال خليج السويس.

طيب يعني إيه 2000 ميجاوات؟، إحنا بنتكلم عن قدرة كهربائية ضخمة قادرة على دعم الشبكة القومية وتقليل الاعتماد على الوقود التقليدي، وفي نفس الوقت تخفض استهلاك الغاز الطبيعي المستخدم في محطات الكهرباء.

لكن الأهم من المحطة نفسها هو المصنع، لأن لأول مرة مصر هتدخل مجال تصنيع توربينات الرياح محليًا بدل الاعتماد الكامل على الاستيراد، وده معناه أن جزء كبير من المعدات اللي كانت بتيجي من الخارج بالدولار هيتصنع جوه مصر.

مش بس كده، الخطة كمان بتستهدف تصدير جزء من الإنتاج لأسواق أفريقيا والشرق الأوسط، مستفيدة من الاتفاقيات التجارية اللي مصر مرتبطة بيها.

السؤال المهم هنا.. هل مصر هتبقى مركز إقليمي لصناعة معدات الطاقة المتجددة؟، الأرقام بتقول إن المصنع الجديد هيكون عنده قدرة إنتاجية تصل إلى 2 جيجاوات سنويًا، وده رقم كبير جدًا يخليه يخدم السوق المحلي وكمان أسواق خارجية، كمان المشروع كله هيتم بالجنيه المصري، ودي نقطة مهمة لأن الدولة بتحاول تقلل الاعتماد على العملات الأجنبية في تنفيذ مشروعات الطاقة.

الحكومة كمان بتراهن على هدف أكبر، وهو إن الطاقة المتجددة توصل لنحو 45% من إجمالي مزيج الطاقة خلال السنوات القليلة الجاية، وده معناه توسع أكبر في الطاقة الشمسية وطاقة الرياح وأنظمة تخزين الكهرباء، يعني إحنا مش قدام مصنع جديد بس، لكن قدام خطوة ممكن تنقل مصر من دولة بتستورد معدات الطاقة المتجددة إلى دولة بتصنعها وتصدرها.