هل الفراخ فيها مشكلة؟.. السر وراء هبوط الأسعار المفاجئ
الفراخ فيها مشكلة.. بعد الهبوط في الأسواق كله بقى يسأل أسعار الفراخ رايحة على فين وايه سر الهبوط المفاجئ ده وهل الفراخ فيها مشكلة أو المزارع بتصفي مثلا زي ما بيتقال.
بس الحقيقة عكس كده تماماً وبورصة الدواجن طمنت الكل وأعلنت إن الموضوع كله توازن طبيعي في آليات العرض والطلب وما لوش أي علاقة بالأكاذيب المنتشرة.
السر الحقيقي وراء انخفاض الأسعار هو الإفراجات المستمرة عن شحنات الصويا والذرة الصفراء في المواني وده وفر الأعلاف للمربين بأسعار مستقرة جدا.
ده غير إن المزارع مع دخول الصيف بدأت تطبق أنظمة تبريد وإجراءات وقائية قوية عشان تحمي الإنتاج من موجات الحر وتمنع أي فاقد وبالتالي الفراخ سليمة 100% والمعروض منها كتير في السوق.
وعشان تطمنوا أكتر الأسعار النهاردة مستقرة جداً.. كيلو الفراخ البيضاء في المزرعة من 60 لـ 62 جنيه وبتوصل للمستهلك في المحلات بين 75 و 80 جنيه.. والساسو الحمراء بتصل للمستهلك بين 92 و 98 جنيه والبلدي بين 110 و 115 جنيه والبانيه تراوح بين 210 و 215 جنيه.. والتوقعات بتأكد إن الأسعار مكملة في الهبوط التدريجي فاشتروا وأنتوا مطمنين.
