30 ألف شقة جايين.. إمتى الحجز وهيبقى بكام؟

لو كنت مستني شقة من الإسكان الاجتماعي، فممكن يكون الخبر ده مهم جدًا ليك، وزارة الإسكان بتستعد تطرح حوالي 30 ألف وحدة سكنية جديدة ضمن إعلان "سكن لكل المصريين 9"، والطرح متوقع خلال أسابيع قليلة، بعد الانتهاء من كراسة الشروط والتفاصيل النهائية.

الوحدات الجديدة مخصصة بالكامل لفئة منخفضي الدخل، وهتتوزع على عدد كبير من المدن الجديدة والمحافظات المختلفة، مع أنظمة تمويل عقاري ميسرة وفترات سداد طويلة ممكن توصل لـ20 سنة.

وبحسب الأسعار المعلنة في الطروحات السابقة، كانت بعض الوحدات الجاهزة تبدأ من 184 ألف جنيه لمساحة 75 متر، وتصل إلى 270 ألف جنيه لمساحة 90 متر، بينما الوحدات المقرر تسليمها خلال 3 سنوات تراوحت أسعارها بين 850 و900 ألف جنيه.

أما بالنسبة للأوراق المطلوبة، فهتحتاج بطاقة الرقم القومي، وإثبات دخل، وإيصال مرافق حديث، ومستندات الحالة الاجتماعية وغيرها من المستندات الأساسية.

لو ناوي تحجز، يبقى جهز ورقك من دلوقتي واستعد لفتح باب التقديم قريبًا جدًا.