تحذير مهم من الكهرباء.. تجاهل ضبط ساعة العداد أبو كارت بيقطع التيار حتى لو شاحن

لو ماظبطتش الوقت العداد هيقف.. لو عندك عداد كهرباء كارت في البيت وبتتفاجأ إنه بيفصل فجأة والنور بيقطع رغم إنك لسه شاحن فخد بالك.

الشركة القابضة للكهرباء حذرت الناس اللي عندها عداد أبو كارت وقالت إن في غلطة بنقع فيها كلنا وهي إننا بنطنش نظبط الوقت والتاريخ بتوع العداد والموضوع ده بيخلي عدادك يفصل فجأة.

والسبب إن ساعة العدادت مأخرة أو مقدمة والعداد فاكر نفسه في وقت تاني خالص والمفاجأة إنك مش هتعرف تظبط الساعة دي بنفسك ولا من الزراير لأنها محتاجة سيستم الشركة نفسه.

وعشان تحمي نفسك من الورطة دي الموضوع بسيط ومش هيكلفك ولا مليم وكل اللي عليك هتاخد كارت العداد وتطلع بيه على شركة الكهرباء اللي تابع ليها والموظف هناك هيظبطلك الوقت والتاريخ الصح على الكارت في دقيقتين وببلاش ومن غير أي رسوم وأول ما ترجع البيت حط الكارت في العداد.