ضربة قوية للدولار بعد العيد.. الجنيه ينتعش بعد تراجع كبير
بعد ما الدولار كان مولع السوق الأيام اللي فاتت فجأة المشهد اتقلب والجنيه رجع ياخد نفسه من جديد.. فيا ترى هل اللي بيحصل ده بداية هبوط حقيقي للدولار ولا مجرد استراحة مؤقتة قبل موجة صعود جديدة؟ وليه الدولار نزل تحت 52 جنيه في أغلب البنوك بعد ما كان قريب من كسر مستويات أعلى من كده؟ وايه دور الموال الساخنة وتحويلات المصريين بالخارج في اللي بيحصل في سوق صرف الدولار؟
النهارده السوق المصري صحى على تراجع واضح في سعر الدولار والعملة الأمريكية أنهت سلسلة المكاسب اللي كانت مستمرة خلال الأيام الماضية والأهم من كده إن الجنيه المصري استفاد من زيادة التدفقات الدولارية اللي دخلت السوق سواء من تحويلات المصريين في الخارج أو من دخول استثمارات أجنبية جديدة في أدوات الدين الحكومية
لو بصينا على أسعار البنوك هنلاقي إن أعلى سعر للدولار كان في بنك أبوظبي الإسلامي عند 52.14 جنيه للشراء و52.24 للبيع بينما أقل سعر اتسجل في بنك الإمارات دبي الوطني والبنك العقاري المصري العربي عند 51.55 جنيه للشراء و51.65 للبيع وفي البنوك الكبرى زي الأهلي المصري والتجاري الدولي والإسكندرية السعر دار حوالين 51.68 للشراء و51.78 للبيع يعني ببساطة الدولار رجع يتحرك تحت مستوى 52 جنيه في معظم البنوك
طيب إيه اللي دعم الجنيه بالشكل ده؟
في أكتر من عامل مهم أولهم إن تحويلات المصريين العاملين بالخارج حققت أرقام قياسية خلال السنة المالية الحالية ووصلت في أول 9 شهور من يوليو 2025 لحد مارس 2026 لحوالي 34.9 مليار دولار بزيادة 32% عن نفس الفترة من السنة اللي قبلها وده رقم ضخم بيدخل سيولة دولارية مباشرة للبنوك والسوق
كمان البنك المركزي أعلن إن احتياطي النقد الأجنبي وصل لـ53.134 مليار دولار بنهاية مايو 2026 وده أعلى مستوى في تاريخ مصر تقريباً الرقم ده معناه إن الدولة عندها غطاء دولاري أقوى وقدرة أكبر على تلبية احتياجات الاستيراد وسداد الالتزامات الخارجية وده بيطمن السوق وبيقلل الضغط على الجنيه
وفي نقطة تانية مهمة ناس كتير ممكن ما تاخدش بالها منها وهي دخول أموال أجنبية للسوق الثانوية للدين الحكومي المصري التقرير بيقول إن العرب والأجانب سجلوا صافي شراء بحوالي 2.3 مليار دولار الأسبوع اللي فات وده معناه إن في طلب على الجنيه عشان المستثمرين يدخلوا يشتروا أدوات دين مصرية
طب هل الجنيه يقدر يكمل التحسن ولا الدولار هيرجع يضغط من جديد؟
الحقيقة إن السوق لسه بيتابع أكتر من ملف في نفس الوقت زي حركة الفايدة الأمريكية وأسعار الذهب والنفط وحجم التدفقات الأجنبية واستمرار تحويلات المصريين بالخارج لكن اللي واضح حالياً إن الجنيه أخد دفعة قوية من وفرة الدولار في السوق مقارنة بالفترة اللي كان فيها نقص واضح في العملة الصعبة
واللافت كمان إن الجنيه كان أنهى 2025 بأداء قوي وارتفع 6.7% قدام الدولار خلال العام وده بعد فترة طويلة من الضغوط والتراجعات يعني اللي بيحصل النهارده مش حدث معزول لكنه مرتبط بتحسن نسبي في موارد النقد الأجنبي واستعادة جزء من السيولة داخل القطاع المصرفي.
في النهاية السوق لسه مفتوح على كل الاحتمالات لكن الرسالة الحالية واضحة الدولار فقد جزء من مكاسبه والجنيه رجع يلتقط أنفاسه بدعم من تدفقات دولارية قوية واحتياطي تاريخي وتحويلات غير مسبوقة من المصريين في الخارج والسؤال اللي الأيام الجاية هتجاوب عليه هو هل التحسن ده مستمر ولا هنشوف جولة جديدة من التقلبات في سوق الصرف المصري.
