تعويضات وفلوس زيادة.. موعد ونسبة الزيادة الجديدة للمعاشات

المعاشات هتزيد 15٪.. الفترة الأخيرة مافيش اسالة غير عن أصحاب المعاشات و معاد الزيادة الجديدة ونسبتها هتكون كام وهل ممكن تعدي الـ 15%.

خليني اقولك أن نقابة أصحاب المعاشات حسمت الجدل ووضحت إن الزيادة السنوية بحسب القانون مش بتزيد عن 15% كحد أقصى والمفروض بتطبق في 30 يونيو من كل عام وينزل الصرف تلقائي مع معاش شهر يوليو المقبل اللي هو بداية العام المالي الجديد.

لكن بعيد عن الزيادة فيه مشكلة تانية بتواجه ناس كتير وهي عطل سيستم المعاشات اللي تسبب في تأخير الصرف للناس اللي خرجت معاش من أول يناير الماضي ورغم إن الصندوق صرف لهم مبلغ 10000 جنيه كجزء من مستحقاتهم قبل العيد عشان يمشوا أمورهم إلا إن النقابة بتطالب بصرف تعويض مالي عادل لكل المتضررين من التأخير ده بسبب السيستم مش مجرد سلفة من فلوسهم.