قفزة جديدة لسعر الدولار.. أرباح قياسية للتجاري الدولي.. وتراجع مفاجيء للدهب
شهدت الساحة الاقتصادية، العديد من الأحداث اليوم، والتي يأتي من أبرزها قفزة جديدة لسعر الدولار.. أرباح قياسية للتجاري الدولي.. وتراجع مفاجيء للدهب.
والبداية من سوق صرف العملات الأجنبية.. اللي سجل فيها سعر صرف الدولار في مصر ارتفاع جديد خلال تعاملات النهاردة.. وعادت العملة الأمريكية لتجاوز مستوى 53 جنيه مرة تانية في معظم البنوك المصرية.
للأسف الجنيه المصري ما قدرش يكمل مسيرة التعافي اللي بدأها الأسبوع اللي فات واللي كانت خلت الدولار يتداول حول مستوى 52 جنيه.. ورجع الأخضر يكسر مستويات قياسية بالتزامن مع استمرار التوترات الجيوسياسية في المنطقة.
وجاء أعلى سعر لصرف الدولار في بنوك أبوظبي الإسلامي والمصرف المتحد والأهلي الكويتي وميد بنك عند مستوى 53.27 جنيه للشراء مقابل 53.37 جنيه للبيع.
أما أقل سعر لصرف الدولار فكان في بنك الإمارات دبي الوطني عند مستوى 52.67 جنيه للشراء مقابل 52.77 جنيه للبيع.
وفي بنك مصر سجل سعر الدولار 53.07 جنيه للشراء مقابل 53.17 جنيه للبيع.. وبلغ السعر في بنوك كريدي أغريكول ونكست وسايب 53.05 جنيه للشراء مقابل 53.15 جنيه للبيع.. ووصل في البنك الأهلي المصري لـ 53.02 جنيه للشراء و53.12 جنيه للبيع.
ولدى البنك المركزي المصري سجل سعر صرف الدولار مستوى 52.75 جنيه للشراء مقابل 52.89 جنيه للبيع.
ونروح للبنك التجاري الدولي - مصر اللي ارتفع صافي أرباحه بنسبة 7 في المية على أساس سنوي ووصل لـ 17.8 مليار جنيه خلال الربع الأول من 2026.. والزيادة دي كانت مدعومة بارتفاع صافي الدخل من الفوائد بنسبة 17 في المية عشان يسجل 29.7 مليار جنيه.
وساهم ارتفاع الدخل من الفوائد في تعويض الانخفاض اللي حصل بنسبة 7 في المية في الدخل غير المرتبط بالفوائد.. واللي البنك أرجعه لوجود "دخل استثنائي" كان ناتج عن بيع أسهم في شركات شقيقة في الربع الأول من سنة 2025.
كمان الإيرادات بلغت 31.2 مليار جنيه خلال الفترة دي بزيادة قدرها 15 في المية على أساس سنوي.
ووصلت نسبة القروض للودائع بالعملة المحلية في البنك لأعلى مستوى ليها في التاريخ لما سجلت 72 في المية.. مدعومة بنمو الودائع بنسبة 5 في المية وزيادة قدرها 33 مليار جنيه خلال أول تلات شهور من السنة بس.
نمو القروض خلال الربع ده كان مدفوع بقطاع الخدمات المصرفية للمؤسسات.. اللي سجل نمو بنسبة 8 في المية أو ما يعادل 41 مليار جنيه.
ونروح لسوق الصاغة.. اللي شهد فيها سعر الذهب النهاردة تراجع بحوالي 5 جنيهات خلال التعاملات.. بالتزامن مع انخفاض أسعار المعدن الأصفر عالمياً وسط حالة ترقب من المستثمرين لبيانات التضخم الأمريكية وتطورات الأوضاع الجيوسياسية في الشرق الأوسط.. خاصة بعد تعثر جهود التهدئة بين أمريكا وإيران.
وسجل سعر الذهب النهاردة عيار 21.. الأكثر مبيعاً في السوق المصرية حوالي 6995 جنيه.. فيما بلغ سعر الجنيه الذهب 55 ألف و960 جنيه.. وسط حالة من الترقب في الأسواق بخصوص اتجاه أسعار الفائدة الأمريكية الفترة اللي جاية.. وجاءت الأسعار في الصاغة كالتالي:
سعر الذهب عيار 18 سجل 5996 جنيه.
سعر الذهب عيار 21 سجل 6995 جنيه.
سعر الذهب عيار 24 سجل 7994 جنيه.
سعر الجنيه الذهب سجل 55 ألف و960 جنيه.
سعر الأوقية عالمياً بلغ 4699 دولار.
سعر الأوقية في الصاغة سجل 248 ألف و613 جنيه.
السعر المحلي للفضة سجل 136 جنيه.
ونختم من وزارة الصناعة.. اللي عقد فيها المهندس خالد هاشم وزير الصناعة لقاء موسع مع وفد مجموعة شركات غوروك التركية برئاسة أسين غورال أرغات نائب رئيس المجموعة.. لبحث خطة المجموعة لإقامة مشروع صناعي جديد في مصر يستهدف التصدير للأسواق الخارجية.
الاجتماع استعرض ملامح واحد من المشروعات الصناعية اللي المجموعة ناوية تنفذها في مصر.. والمتخصص في إنتاج أدوات المائدة الزجاجية على مساحة 150 ألف متر مربع.. وده هيسهم في توفير حوالي 1000 فرصة عمل جديدة..
وكمان الاجتماع اتكلم عن جهود المجموعة في استخدام أحدث التكنولوجيات الصناعية.. وتطبيق نظم متطورة لترشيد استهلاك الطاقة والمياه وتعزيز كفاءة العمليات الإنتاجية.
واستعرض الوزير خلال اللقاء الحوافز الاستثمارية اللي بتقدمها الدولة حالياً لقطاع الصناعة باعتباره قاطرة التنمية الاقتصادية الشاملة.. واللي المجموعة تقدر تستفيد منها وخاصة حوافز التصدير.
