ليه الدولار رجع يقفز تاني.. ايه اللي بيحصل في البنوك
ليه الدولار رجع يزيد بقوة أمام الجنيه في أول تعاملات البنوك النهاردة وهل الارتفاعات دي هتستمر ولا هيرجع ينزل تاني.. وايه تأثير ارتفاع العملة الأمريكية على الأسواق المصرية.
النهاردة الدولار تخطي الـ 51 جنيه في بنوك مصر ووصل لأقصى سعر في التعاملات الصباحية لحوالي 51.33 جنيه ودي أكبر زيادة في سعر الدولار من 3 شهور وبمقارنة أسعار الدولار النهاردة بأسعار يوم الخميس هتلاقي إن فرق العملة الأمريكية قفزت من 50.54 إلى 51.33 جنيه يعني بنتكلم في فرق 80 قرش تقريبا ودي طبعا زيادة كبيرة.
طيب ايه سر الزيادة المفاجئة في أسعار الدولار النهاردة ؟
الحقيقة فيه اكتر من سبب لصعود الوحش الأمريكي أولها كول فترة الإجازات في الفترة اللي فاتت بسبب اعياد الفطر ودا خلق نوع من تراكم الطلب على الدولار من الشركات والهيئات المختلفة والمستثمرين والمستوردين ودي حاجه بتحصل بعد العودة من كل إجازة طويلة للبنوك يعني مش اول مرة وبما الطلب بيرجع لحالته الطبيعية الأمور بتستقر في سوق الصرف.
كمان فيه اسباب تانية وراء زيادة سعر الدولار زي توسيع الحكومة المصرية لمشترياتها للسلع الاستراتيجية وتأمين الاحتياجات التمويلية ودا تحسبا لأي طاريء أو تصعيد في المنطقة اللي حولينا أو التصعيد في الأزمات الدولية والتجارية بين الولايات المتحدة وبقية دول العالم يعني مصر بتعمل خطوة استباقية عشان تأمن احتياجات المصريين من أي سلعة ولمدد طويلة جدا .
في نفس الوقت السنة دي مصر بتسدد أكبر نسبة دين خارجي ومصر عمرها ما تاخرت أو تخلفت عن سداد ديونها ودا معناه ضغط على الدولار لكنه ضغط مؤقت .
يعيني باختصار كده زيادة أسعار الدولار النهاردة متقلقش لأن ظاهرة طبيعية ومؤقتة لأن الموضوع عرض وطلب ودا حكم السوق من ساعة قرار التعويم والارتفاع النهاردة مش مرتبط بأزمات أو نقص في العملة بالعكس كل المؤشرات بتقول إن التدفقات النقدية من الدولار بيزيد من كل الموارد والقطاعات الدولارية بشهادة المؤسسات المالية الدولية يعني مفيش خوف من أزمات.
طبعا اي زيادة في سعر الدولار بتحمل الدولة تكاليف زيادة في استيراد السلع الأساسية من الخارج وفي نفس الوقت بترفع نسب التضخم واسعار السلع على المواطنين بسبب الاستيراد وعشان كده الدولة بتسابق الزمن عشان تقلل فاتورة الاستيراد بأقصى حد ممكن من خلال توطين الصناعات المحلية وتوسيع الصناعات القائمة وفي نفس الوقت شغالة على تطوير وتنمية الموارد الدولارية في القطاعات الطبيعية للدولة زي السياحة وتحويلات المصريين بالخارج والاستثمار والتصدير وقناة السويس وغيرها عشان تضمن استدامة في تدفقات الدولار.
