حكاية المشروع الكوري في مصر.. مستوى جديد من الاستثمارات
ايه حكايه المشروع الكوري الجديد في مصر وازاي هيغير الأوضاع في قطاع التجارة والموانئ المصرية وعلاقته بملف الاستثمارات.
الاقتصاد مش بس انتاج وتصنيع وتصدير لكن فيه تفاصيل كتير جدا خاصة بمنظومة الاقتصاد والتجارة بتختلف من دولة لدولة تانية والتفاصيل دي هي اللي بتخلي دول بعينها عندها قوة تصديرية ومنافسة في الأسواق العالمية وبنتكلم هنا الإجراءات اللي بتسهل عمليات انتقال البضائع والمنتجات من المصانع في مصر للاسواق الدولية في كل دول العالم ومدى التكنولوجيا المستخدمة لضمان وصولها بسرعة وتحقيق عامل الوقت وزيادة التنافسية والتواجد في أسواق العالم.
والمنظومة دي مهمة في أي موانئ في أي بلد لأن لو الإجراءات بطيئة وبدائية وبتاخد وقت طويل المستوردين هيتجهوا الدول تانية عندها الإجراءات اسرع لأن مفيش رفاهية الوقت في المنافسة على الأسواق الدولية.
طيب ايه علاقة دا بالموانئ المصرية ونفاذ المنتجات المحلية للأسواق العالمية؟
زي ما احنا عارفين إن مصر عملت شبكة موانئ عالمية وعلى أحدث النظم في العالم من أرصفة واوناش وتخزين وشحن وتفريغ لكن تيجي مرحلة مهمة جدا خاصة بالتكنولوجيا المستخدمة في دول العالم المتقدم الخاصة بإنهاء إجراءات استيراد وتصدير المنتجات ودي التفاصيل المهمة اللي بنتكلم عليها ومصر انتبهت للنقطة دي في الوقت المناسب خاصة مع التطور المستمر في آليات عمل المواني ووقعت اتفاقيات مهمة للوصول لأفضل أداء داخل الموانئ المصرية وكان آخرها الاتفاق بين وزارة التخطيط والتنمية الاقتصادية والتعاون الدولي و بين بعثة الوكالة الكورية الجنوبية للتعاون الدولي لتنفيذ مشروع مهم جدا في مصر وهو عبارة عن منصة رقمية لمواجهة الزيادة التنافسية العالمية للمنتجات وزيادة سرعة نفاذ المنتجات المصرية للخارج.
المنصة الرقمية دي بتستهدف إدارة المخاطر المتكاملة والشاملة لتسهيل التجارة في مصر واللي بيتم تنفيذه لصالح الهيئة العامة للرقابة على الصادرات والواردات.. ومشروع المنصة الرقمية هيساهم في تعزيز القدرة التنافسية من خلال تسريع عمليات الفحص والتخليص الجمركي وتقليل العقبات الإدارية وتحقيق المعايير الدولية في التجارة الخارجية.. كمان المشروع بيتماشى مع التوجهات الاستراتيجية لمصر للتحول الرقمي وتحقيق الاستدامة الاقتصادية لانه هيوفر بيانات دقيقة هتساعد في وضع سياسات أكتر كفاءة وفعالية في قطاع التجارة والصناعة.
المشروع الكوري في المواني المصرية هيحقق تكامل رقمي بين الهيئات الحكومية المختلفة وتعزيز كفاءة العمل الحكومي وتقليل من الإجراءات البيروقراطية المعقدة وتحسين بيئة الأعمال وجذب المزيد من الاستثمارات الأجنبية زي ما قلنا وكمان هيساهم في تحسين ترتيب مصر في المؤشرات العالمية الخاصة بسهولة ممارسة الأعمال والتنافسية الاقتصادية.
وعلى فكرة مصر واحدة من 5 شركاء اللي ليهم أولوية على مستوى جهود التعاون الإنمائي لكوريا الجنوبية لتعزيز عمق وأهمية التعاون الثنائي بين البلدين ويعكس الالتزام المشترك بتحقيق التنمية المستدامة.
