قلاع صناعية ومشروعات ضخمة تدخل الخدمة.. إيه اللي هيحصل في مصر الايام الجاية
اقتصاد مصر رايح على فين في الأيام والشهور الجاية.. وازاي المشروعات الجديدة هتغير خريطة الاقتصاد الوطني وتحوله لاقوى الاقتصادات في المنطقة.
مصر النهاردة بتخوض واحدة من أكبر مراحل التطوير والتنمية في تاريخها الحديث وده من خلال مشروعات قومية عملاقة في كل المجالات سواء زراعة أو صناعة أو تجارة والمشروعات دي مش بس هتساعد في تحسين الاقتصاد، لكن كمان هتوفر فرص عمل جديدة وهتقلل من اعتمادنا على الاستيراد وده هيخلي مصر أقوى وأقدر على مواجهة التحديات اللي جاية.
ومن أهم المشروعات اللي شغالة دلوقتي وبتاخد اهتمام كبير هي مشروع الدلتا الجديدة ومجمع ألستوم الصناعي وإنشاء مصانع السيارات الجديدة ومشروعات الساحل الشمالي ومشروعات دول الخليج في مصر وكل مشروع فيهم ليه دور كبير في دفع البلد لقدام.
ولو هنبدأ بمشروع الدلتا الجديدة فهو يعتبر من أكبر المشروعات الزراعية في مصر والهدف منه هو استصلاح وزراعة أكتر من 2 مليون و200 ألف فدان في الصحراء الغربية باستخدام تقنيات ري حديثة توفر المياه وتعظم الإنتاج
والمشروع من ضخامته بيعادل تلت المساحة الزراعية الحالية في مصر كلها.. المشروع ده مش بس هيساعد في زيادة الإنتاج الزراعي وتحقيق الاكتفاء الذاتي لكن كمان هيخلق فرص عمل كتير وهيعمل مجتمعات زراعية جديدة تساهم في تقليل الضغط على المدن وزيادة الرقعة السكانية وزيادة الأمن الغذائي للمصريين وغير كده الاعتماد على الزراعة الحديثة في المشروع ده هيخلي المحاصيل المصرية تنافس عالميا وده هيكون مكسب كبير للاقتصاد.
أما في المجال الصناعي، شركة ألستوم الفرنسية قررت تستثمر في مصر وتبني مجمع صناعي ضخم في مدينة برج العرب في الإسكندرية.
والمشروع ده هيكون متخصص في تصنيع أنظمة السكك الحديدية وكمان العربات الخاصة بالمترو والقطارات السريعة والترام والمونوريل ودخول شركة عالمية زي ألستوم في مصر معناه إننا بنبدأ مرحلة جديدة في الصناعة المحلية، وده هيقلل من استيراد المعدات دي ويوفر عملة صعبة للبلد، وكمان يفتح مجال التصدير للدول التانية، وده هيدعم الاقتصاد بشكل كبير جدًا.
وبخصوص القطارات مصر بتنفذ مشروع ضخم هيعمل نقلة نوعية في وسائل النقل الجماعي وهيساهم في تطوير الاقتصاد، السياحة، والاستدامة البيئية وهو مشروع القطار الكهربائي فائق السرعة واللي بيعتبر أحد أهم المشروعات القومية اللي بتهدف إلى تطوير شبكة النقل في مصر لانه بيهدف إلى إنشاء أول شبكة قطارات سريعة في مصر وخلق مجتمعات صناعية وعمرانية واستثمارية على طول مساره.
وفي قطاع السيارات، مصر دلوقتي بقت وجهة جذابة لشركات السيارات العالمية، وده اللي خلى فيه استثمارات جديدة في مصانع إنتاج وتجميع السيارات.
المصانع دي مش بس هتقلل الاستيراد، لكنها كمان هتساعد في خلق صناعة محلية قوية وتوفر فرص عمل لشباب كتير كمان مع التوجه العالمي ناحية السيارات الكهربائية، المصانع دي ممكن تكون بداية لمصر علشان تبقى من الدول الرائدة في إنتاج العربيات الكهربائية، وده معناه مستقبل نظيف ومستدام للبلد.
كل المشروعات دي بتقول إن مصر داخلة على فترة ازدهار كبيرة ولو فضلنا ماشيين بنفس السرعة دي هنلاقي نفسنا بعد كام سنة في مكانة مختلفة تماما اقتصاديا وصناعيا وزراعيا والاستثمار في المشروعات القومية دي هو مفتاح النجاح وهيخلينا نقدر نواجه أي تحديات جايه بثقة وقوة وده اللي بيأكد إن المستقبل لمصر.
