هيغير حاجات كتير في أسواق العالم.. موعد اجتماع "الفيدرالي الأمريكي" الجاي.. وتوقعات أسعار الفائدة
يا ترى امته البنك الفيدرالي الأمريكي هيجتمع تاني، بعد آخر مرة واللي كانت يوم الأربع اللي فات، وإيه هي القرارات المنتظرة منه بخصوص أسعار الفايدة الفترة الجاية، هل هيلجأ للتخفيض زي ما بنوك وخبرا كتير توقعوا، ولا هيضطر للتثبيت؟.
في الأيام الأخيرة، مجلس الاحتياطي الفيدرالي الأمريكي اجتمع وتحديدا يوم الأربعاء اللي فاتت، وقرر تثبيت سعر الفايدة بدون تغيير، ودي كانت للمرة الثالثة على التوالي.
وقرار التثبيت ده بيشير لاحتمالية إجراء خفض في أسعار الفايدة خلال الاجتماعات الجاية في سنة 2025، وده لأن ميعاد اجتماع الفيدرالي الأمريكي الجاي هيكون في شهر مايو المقبل، يعني شهر 5.
ووفقًا للجدول الزمني لاجتماعات البنك الفيدرالي الأمريكي، فالاجتماع الجاي ممكن يشهد خفض أسعار الفايدة، وهيعلن القرار يكون خلال يوم 6 أو 7 مايو، عشان يحدد أسعار الفايدة في أمريكا، واللي بناء عليها في بنوك مركزية كتير في كل دول العالم بتاخد قراراتها وبتحدد سياستها المالية خلال الفترات الجاية.
أما بقى مواعيد اجتماعات الفيدرالي الأمريكي في الفترة المتبقية من سنة 2025، فعندك الاجتماع الثالث هيكون يوم 6 و 7 مايو، والاجتماع الرابع هيكون يومي 17 و18 من شهر يونيو، والاجتماع الخامس يومي 29 و30 من شهر يوليو المقبل.
أما الاجتماع السادس، فهيكون في يومي 16 و17 من شهر سبتمبر، والسابع في يومي 28 و29 من شهر أكتوبر، وأخيرا الثامن في يومي 9 و10 من شهر ديسمبر، يعني آخر السنة.
ولو ماتعرفش، بالبنك الفيدرالي كان أكد إن قرار تثبيت الفايدة الأخيرة بيجي بالتزامن مع مخاوف تأثير الرسوم الجمركية على الاقتصاد الأمريكي، عشان كده أبقى على سعر الفايدة عند مستويات بين 4.25% و4.5%، وكان الاجتماع الأول كمان اللي انعقد في شهر يناير اللي فات، تم فيه الإبقاء على سعر الفايدة بدون تعديلات، لكن كل التوقعات بتقول إن الاجتماع التالت واللي ينعقد قريب جدا هيفاجىء الجميع وهيخفض الفايدة.
وبناء على القرار المنتظر، فمتوقع إن نسب التضخم تتراجع في الفترة الجاية، لأنها بتكون مؤشر قوي جدا بيدفع البنوك المركزية لاتخاذ قرارات بتحديد أسعار الفايدة، وغير كده الأسواق المحلية في كل بلاد العالم هتشهد انتعاش اقتصادية هيستفيد منها ناس كتير جدا، وهتعود بالخير للجميع خاصة مع تراجع أسعار السلع المتوقعة في الفترة الجاية.
