ليه مصر بتخزن الذهب.. وسر ارتفاع الاحتياطي الأصفر
ليه مصر بتخزن الدهب وبتزود الاحتياطي النقدي من المعدن الأصفر في خزائن البنك المركزي المصري وايه فايدة الدهب في الاحتياطي وليه بيكون عامل امان كبير.
من ساعات البنك المركزي المصري أعلن عن زيادة احتياطي النقد الأجنبي المصري بقيمة 129 مليون دولار خلال شهر فبراير الماضي ووصل إلى 47.394 مليار دولار مقارنة بـ 47.265 مليار في يناير اللي فات.. وناس كتير فاكرة إن الاحتياطي النقدي دولار بس لكن الحقيقة إن الدهب بيعتبر جزء مهم جدا من الاحتياطي النقدي لاي دولة لانه بيعتبر فلوس مش معدن في الأسواق العالمية وقيمته وحجمه في أي دولة بيكون مهم جدا لتعزيز مكانتها الاقتصادية وفي جذب الاستثمارات الخارجية والقدرة المالية للدولة زيه زي الاحتياطي من الدولار والعملات التانية بالظبط وكمان في تصنيف الدول ائتمانيا.
الحقيقة الدهب بيعتبر واحد من الملاذات الآمنة للدول في وقت الأزمات الدولية والإقليمية يعني تقدر تقول كده كله بيجري يشتري دهب عشان يأمن نفسه من اي هزات في أسواق العملة أو السلع أو التوترات الجيوسياسية يعني البنوك المركزية العالمية بتعمل زي المواطن العادي اللي بيحس بالخطر من انخفاض قيمة العملة أو من الحرب فيجري يحول فلوسه لدهب ويشيله وعشان كده سموه ملاذ آمن لأنه عمره ماخذل المستثمرين بسبب إن سعره دايما بيزيد وبيحافظ على قيمة العملة.
طيب مصر عندها دهب قد ايه احتياطي واشترت قد ايه في الشهور الأخيرة ؟
حسب البيانات الرسمية واصل البنك المركزي المصري شراء الدهب للشهر التاني على التوالي واشترى 18.1 ألف أونصة دهب خلال شهر فبراير اللي فات بعدما اشترى حوالي 16.4 ألف أونصة في يناير 2025 وارتفع رصيد الدهب في البنك المركزي المصري إلى 4.11 مليون أونصة بنهاية شهر فبراير الماضي ووصلت قيمته 11.85 مليار دولار..
ومن ميزات الدهب كاحتياطي نقدي أن البنوك المركزية بتشتريه من السوق المفتوح وبتختار الأوقات المناسبة للشراء عشان تستحوذ على اكبر كمية ممكنة وعلى فكرة الدهب سوق كبير يعني احيانا البنوك المركزية الكبيرة بتطرح كميات للبيع من الاحتياطي بتاعها وهكذا يعني احتياطي واستثمارات في نفس الوقت.
وعلى فكرة احتياطي الدهب في البنك المركزي المصري ملهوش علاقة باحتياطي الذهب اللي في البيوت المصرية مع المواطنين أو اللي في حوزة شركات الدهب والتجار والصاغة يعني دا حاجة مختلفة. احتياطي الدهب في المركزي بيكون سبائك من الحجم الكبير والمتوسط وليه ترقيم معين وبيتشال في أماكن سرية محدش يعرف عنها حاجة ومتأمنة كويس جدا عشان دي ملك البلد كلها.
