صناديق وسبايك.. ليه الاستثمار في الدهب لسه مربح
ليه الدهب لسه استثمار مربح وايه السر في الإقبال على المعدن السحري وازاي استثمر صح في المعدن الأصفر وايه ميزاته..
أهل الاقتصاد بينصحوا دايما بالاستثمار في الدهب والمنتجات البنكية والعقارات وخاصة إن لكل نوع من دا ميزة مهمة جدا ومثلا الاستثمار في الدهب مضمون ومربح على المدى الطويل وكمان الاستثمارات في شهادات الادخار مناسب جدا مع الفايدة العالية وبيعتبر استثمار واضح ومعروف وليه مدة معينة هي مدة الشهادة وليها عائد أو فايدة متفق عليها ومعروفة والعقارات استثمار مناسب وطويل الأجل.
لكن ليه خبراء الاقتصاد بيفضلوا الدهب خاصة للمواطنين في الوقت الحالي؟
ببساطة عشان الاستثمار في الدهب في السوق المصري ليه كذا ميزة أولها إن ملاذ آمن وتاريخي ضد التضخم لانه بيحافظ على قيمته أو يزيدها في أوقات ارتفاع الأسعار وتحرك قيمة العملة في مصر وهنا الدهب بيكون وسيلة فعالة لحماية الثروة والمدخرات والسيولة وكمان الدهب بيكون ملاذ وتحوط ضد تقلبات العملة ودا لأن سعره بيزيد لما بيحصل انخفاض في قيمة مقابل العملات الأجنبية كمان الاستثمار الدهب بيساعد في تنوع المحفظة الاستثمارية ودا معناه تقليل المخاطر الإجمالية لأن الدهب حسب خبراء السوق بيميل إلى التحرك بشكل عكسي مع الأصول التانية زي الأسهم والسندات.
كمان الدهب فيه ميزة مهمة وهي انك ممكن تسيله في أي وقت يعني تقدر تبيعه في أي وقت لتوفير السيولة لانه استثمار في متناول اليد وهنا نحب نقولك انك كل ما احتفظت بالدهب كل ما قيمته زادت وبجانب دا كله فيه حالة طلب متزايد على المعدن الأصفر في مصر وخاصة في أوقات الأزمات الاقتصادية وعدم اليقين ودا معناه زيادة مستمرة في سعر الدهب ومكاسبك من الاستثمار فيه.
خبراء الصاغة بينصحوا المواطنين بالاستثمار في السبايك والجنيهات الدهب لأنها باتباع اكتر من المشغولات وكمان بينصحوا بالاستثمار في صناديق الدهب لأنها بتيح للمستثمرين فرصة الاستثمار دون الحاجة إلى شراء الدهب المادي ودا هيوفر ليهم سهولة ومرونة في الاستثمار ولو متعرفش تم إطلاق أول صندوق مصري للاستثمار في الدهب في مايو 2023، وهو صندوق «إي زد- جولد» من شركة «أزيموت» و تم إطلاق صندوق تاني في يناير 2024، وهو صندوق بلتون إيفولف للاستثمار في الدهب «سبائك»، وصندوق تالت للاستثمار في المعدن الأصفر خلال يونيو 2024 وهو صندوق استثمار شركة الأهلي لإدارة الاستثمارات المالية وايفولف للاستثمار في الدهب ذو العائد اليومي التراكمي وبتعتبر صناديق الاستثمار في الدهب اللي أطلقتها هيئة الرقابة المالية المصرية سنة 2024، وعاء استثماري متخصص للاستثمار في الدهب عن طريق طرح وثائق يتم الاكتتاب فيها من خلال البنوك وشركات مرخص ليها ودا قبل توجيه الحصيلة لشراء الدهب.
