مفاجأة في تخفيض البنوك للفوائد على شهادات الادخار.. صفقات كويتية ضخمة في الطريق.. خطة تحويل المطارات المصرية لكيانات مربحة
منصات بانكير قدمت النهاردة عدد كبير من التقارير المهمة في الشأن الاقتصادي والمالي، البداية كانت تقرير خاص عن تحرك مفاجئ في البنوك عكس قرار المركزي.
وشرح التقرير إن بنوك كبيرة زي بنك مصر والبنك العربي الإفريقي وبنوك تانية زي التجاري الدولي والأهلي قطر الوطني بدأوا يخفضوا فائدة منتجاتهم الادخارية.. يعني مثلاً بنك مصر خفّض فائدة حساب 'سوبر كاش توفير' بتاعه من 23% لـ22.5% وحتى بنك المشرق-مصر بعت رسايل لعملائه قال فيها إن الفائدة على حساب 'المشرق نيو' هتفضل 23% لحد آخر مارس، وبعد كده هيراجعوها.
وشرح بانكير أسباب الخطوة الأخيرة للبنوك وقال إنه ببساطة البنوك بتحاول تظبط تكلفة الأموال عندها.. يعني لما البنك بيديك فايدة عالية على حساب توفير أو شهادة.. ده بيكلفه فلوس كتير عشان يقدر يدفع العائد ده.. لو الفايدة دي مرتفعة أوي وهو مش قادر يحقق نفس العائد من القروض أو استثماراته يبقى بيخسر.. وده اللي حصل الفترة اللي فاتت.
ولفت التقرير إن من فبراير 2022 البنك المركزي رفع الفايدة بنسبة 19%، ووصّلها لـ27.25% للإيداع و28.25% للإقراض عشان يكبح التضخم اللي وصل مستويات قياسية بسبب تحرير سعر الدولار. . بس دلوقتي، البنوك شايفة إن الوضع بيستقر والمركزي ممكن يبدأ يخفض الفايدة قريب فبدأت تستبق الحدث.
وكشف بانكير د إن البنوك بتستبق قرار المركزي عشان تحمي نفسها من الخساير.. لو استنوا لحد ما المركزي يخفض الفايدة رسميًا وبعدين لقيت نفسها بتدفع فايدة عالية على الودايع بينما عوايد الاستثمار أو القروض بقت أقل.. هيبقى فيه خلل كبير في الميزانية بتاعتهم.. يعني مثلاً عوايد أدوات الدين الحكومي – زي السندات والأذون – نزلت الفترة اللي فاتت والطلب على القروض كمان قلّ نسبيًا السنة اللي فاتت.. فالبنوك قالت: 'بدل ما نستنى ونتورط، خلينا نعدل الأمور من دلوقتي.
وقال التقرير إن حاليا البنوك عندها شبه يقين إن المركزي هيخفض الفايدة في الاجتماعات الجاية فبدأت تخفض تدريجيًا دلوقتي عشان متتعرضش لخساير.. وده منطقي جدًا البنك المركزي فعلاً ثبت الفايدة في آخر 7 اجتماعات بس الظروف بقت مهيأة للتيسير النقدي.. يعني التضخم بدأ يهدى.. والإصلاحات الاقتصادية اللي حصلت في 2024 بدأت تظهر نتايجها.. فالبنوك بتحس إن الوقت قرب عشان الفايدة تنزل وبتحضر نفسها للمرحلة الجاية.
منصات بانكير قدمت تقرير مختلف النهاردة عن خطة تطوير قطاع المطارات المصرية ووصولها للعالمية وتحقيق الأرباح.
ولفت التقرير إنه من فترة طويلة ومصر بدأت تنفيذ خطة الاصلاح الاقتصادي بالتعاون مع صندوق النقد الدولي، والخطة دي تضمنت الشراكة مع القطاع الخاص في عدد من الشركات والأصول المملوكة للدولة، وفعلا الدولة بدأت تنفذ الخطة دي وكل فترة بتعلن عن طرح جديد قدام شركات القطاع الخاص للدخول في شراكة في الإدارة والتشغيل، والخطة كانت السبب ان الشركات والقطاعات اللي تم طرحها في البورصة تتحول من مكان عبئ علي الدولة وبيستهلك من ميزانية الدولة، لمصدر دخل جديد بشكل مباشر وغير مباشر ف الدخل القومي المصري.
وشرح بانكير إنه بعد ما الدولة نجحت في طرح عدد كبير من الشركات قدام القطاع الخاص واللي فعلا حول الشركات دي لأماكن اقتصادية ناجحة، واصبحت حاليا واحدة من مصادر الدخل القومي المصري، جه حاليا الدول علي المطارات واللي الدولة بتستعد لطرحهم للشراكة قدام القطاع الخاص.
وكشف بانكير إن عمليات طرح المطارات هيكون لها إدارة خاصة خصوصا أنها واحدة من الحاجات السيادية في الدولة ، واللي في الوقت الحالي محققة خساير في الناتج القومي المصري، وعلشان كده الدولة بتدرس خطوات تحويلها لمصدر دخل لمصر، وفعلا الدولة اعلنت عن طرح عدد من المطارات للشراكة مع القطاع الخاص.
وحسب الدكتور سامح الحفني وزير الطيران المدني الدولة استقرت علي طرح 11 مطار قدام القطاع الخاص وهتكون البداية بمطار الغردقة الدولي، وفعلا الوزارة جت لها عروضت عن عدد كبير من الشركات من مختلف أنحاء العالم منها أكبر 3 شركات في أمريكا اللاتينية وأوروبا وآسيا وعدد كبير من الدول العربية والصين وفرنسا وتركيا.
وحدة أبحاث بانكير قدمت تقرير خاص النهاردة عن صفقات كويتية ضخمة في الطريق
وشرح التقرير إنه بعد زيارة الدكتور مصطفى مدبولي الأخيرة للكويت رئيس وزراء الكويت.. هيزور مصر قريب جدا.. ومش هييجي لوحده.. هيجيب معاه صفقات استثمارية ضخمة .. يعني إحنا قدام صفقات جديدة هتساهم في نهوض الاقتصاد المصري.
وقال التقرير إن الكويت عينها على قطاعات كتيرة في مصر.. أولها السياحة.. الكويتيين عارفين إن مصر فيها كنز سياحي مش موجود في حتة تانية.. فبيفكروا يضخوا فلوس في فنادق ومنتجعات جديدة… تاني حاجة العقارات.. السوق العقاري في مصر بينمو كل يوم والكويت عاوزة تكون جزء من النهضة دي.. تالت حاجة.. الطاقة والكهرباء.. الكويت شايفة إن مصر بقت مركز للطاقة المتجددة في المنطقة.. وده مجال واعد جدًا.. وطبعًا الصناعة والزراعة مش بعيد عن عينهم خصوصًا إن مصر بتحاول تزود الصادرات بتاعتها والكويت عاوزة تكون شريك في النجاح ده.
