لو نفسك تشتري عربية ترحمك من بهدلة المواصلات؟.. هنقولك تعمل إيه
العربية بقت عصب كل بيت مصري حاليا، خصوصا أن بتوفر تعب ومجهود كبير.
في الوقت الحالي مفيش يوم بيعدي من غير كام مشوار علي كام زيارة عائلة وبقت اغلب الاسر المصرية بتقضي يومها في الشارع ما بين مشاوير الشغل والزيارات والخروجات والحاجات الكتيرة اللي بتتطلب أن الاسر تقضي جزء كبير من يومها برا البيت.
المشاوير الكتيرة دي خلت الطلب علي السيارات ارتفع جدا في مصر، خصوصا أن كل الناس بتحاول بكل الطرق أنها تدور علي وسيلة لراحته ورفاهيته، والحاجات دي مش هتيجي الا من خلال عربية تريحه من بدهلة وزحمة المواصلات واللبس اللي بيرجع بيه اخر اليوم مليان تراب.
طيب ازاي اقدر اشتري مواد بسعر كويس ومن غير ما ينضحك عليا؟.
شعبة السيارات وجهت اكثر من نصيحة للمواطنين في حال رغبتهم في شراء سيارة أو نصيحة هيا الشراء عن طريق الكاش لتجنب زيادة قيمة الفوائد، والشراء وقت الضرورة بس واخيتار السيارة اللى تناسب أهدافه، ولأزم يشوف اكثر من عرض للشراء للسيارات قبل الشروع في الشراء.
الشعبة قالت أن في حالة شراء جديدة أو مستعملة عن طريق الكاش ففي الحالة دي المشترى هيدفع سعر العربية مرة واحدة بدون اى اضافات بسبب فوائد التقسيط واللى خلت امر امتلاك عربية في الوقت الحالي صعبة جدا، وضرورة الشراء في حالة الضرورة خصوصا أن العربيات سعرها مرتفع حاليا في مصر.
الشعبة نصحت كمان المواطنين بضرورة القراءة بشكل كويس جدا قبل اتخاذ قرار الشراء والبحث عن افضل عربية تناسب المواطن واسرته خصوصا أن احتياجات كل واحد بتختلف عن التاني .
القراءة برضوا عن السيارات قبل انخاذ قرار الشراء بتعرف الواحد الاسعار الموجودة في الأسواق سواء في الجديد أو المستعمل، وكمان من خلالها بيعرف أبرز الموديلات الموجودة في السوق، وكمان هيعرف مميزات وعيوب كل نوع من الأنواع قبل ما ياخذ قرار الشراء خصوصا أنه لو اشتري وحب يغير هيدفع مبالغ مالية زيادة عن اللي دفعه وقت الشراء بسبب أن الاسعار كل يوم في زيادة.
