معركة تهز أسواق العالم وتهدد بتوقف الموبايلات وأجهزة الكمبيوتر والعربيات.. يا ترى إيه اللي بيحصل؟
تخيل لو فجأة كل الأجهزة الإلكترونية اللي في حياتك وقفت.. الموبايلات مثلا.. اللابتوبات.. وحتى العربيات الحديثة.. كله يوقف مرة واحدة .. موضوع غريب شوية صح ؟ بس ده بالظبط اللي ممكن يحصل لو حصلت أزمة في إنتاج أشباه الموصلات .. السؤال هنا ليه أمريكا والصين بيلعبوا شد حبل على القطاع ده؟ وإزاي صراع الرقائق بقى تهديد حقيقي للأسواق العالمية؟
قبل ما نتلكم فى الصراع المحتدم بين الأمريكيين والصين .. خلينا نقول لحضراتكم الأول يعني إيه أشباه موصلات وليه هي مهمة؟
أشباه الموصلات دي ببساطة هي العقل المدبر لأي جهاز إلكتروني.. الرقائق اللي جوه كل حاجة بنستخدمها.. من الموبايلات للسيارات وأجهزة الذكاء الاصطناعي.. وأي تعطيل في إنتاجها يعني كوارث اقتصادية عالمية.. وده اللي حصل فعلاً وقت أزمة كورونا.. لما نقص الرقائق أدى لتعطيل مصانع كبيرة وخسائر بمليارات الدولارات.
من هنا تحديدا بدأت الحرب.. أمريكا مش عايزة الصين تطور صناعة الرقائق الخاصة بيها.. لأن ده هيخليها أقوى اقتصاديًا وعسكريًا.. عشان كده إدارة بايدن فرضت قيود شديدة على تصدير أشباه الموصلات للصين.. ومنعت شركات أمريكية زي "Nvidia" و"Intel" إنها تبيع للصين أحدث شرائح الذكاء الاصطناعي.
لكن الموضوع ما وقفش عند بايدن.. دلوقتي ترامب راجع بقرارات أشد قسوة.. وبيحاول يضغط على اليابان وهولندا علشان يمنعوا مهندسيهم من صيانة معدات تصنيع الرقائق في الصين.. الفكرة هنا إن من غير الصيانة دي.. المصانع الصينية هتواجه مشاكل كبيرة جدًا وهتبقى غير قادرة على إنتاج رقائق بجودة عالية.
طب ليه اللى بيحصل بين امريكا والصين بيهدد الأسواق العالمية؟
الصراع ده مش مجرد منافسة اقتصادية.. دي حرب باردة جديدة.. أمريكا خايفة إن الصين تستخدم التكنولوجيا دي في تعزيز قوتها العسكرية وتطوير أنظمة ذكاء اصطناعي متقدمة.. ولو استمرت القيود دي ممكن نشوف تطورات كبيرة تهز العالم زي.. نقص عالمي في الرقائق الإلكترونية.. وده هيأثر على أسعار كل المنتجات التكنولوجية.. بالاضافة لارتفاع تكاليف الإنتاج وبالتالي زيادة أسعار العربيات والموبايلات وحتى الأجهزة الطبية.. وده كله هيعمل اضطراب في أسواق المال.. زي ما شفنا انخفاض مؤشر "هانج سنج" للتكنولوجيا 1.6% بعد قرارات ترامب الأخيرة.
طب ايه مستقبل الصراع على أشباه الموصلات؟
الصين مش هتسكت.. وهي أصلاً شغالة على تطوير صناعة الرقائق المحلية بتشجيع شركاتها وباستثمارات ضخمة في المجال.. لكن فيه شية أسئلة مهمة هتفضل بلا اجابات لفترة مش قليلة زي هل هتقدر تستغنى عن التكنولوجيا الأمريكية؟ ولا أمريكا هتنجح في خنق صناعة الرقائق الصينية؟.. وهل الحرب دي ممكن تخرج عن السيطرة وتسبب أزمة اقتصادية عالمية؟ وإزاي الدول التانية زي أوروبا والهند ممكن تستفيد من الصراع ده؟
