7 حقول جديدة في الطريق.. حدث ضخم في قطاع البترول والغاز
ايه الجديد في قطاع البترول والغاز الطبيعي في مصر وازاي مصر هتجاوز كل العقبات وتتحول لمنتج إقليمي للغاز والطاقة في المنطقة كلها وايه الحدث المهم اللي حصل نهاردة وبيقول إن مصر قربت ترجع في صدارة سوق الغاز..
مصر هترجع تاني مركز للطاقة في حوض المتوسط.. دا مش كلامنا لكن دي بيانات الشركات العالمية والمتخصصة في الطاقة واللي أكدت أن مصر لسه عندها كنوز كتيرة من البترول والغاز لسه مظهرتش وان اعمال التنقيب الحالية هتكشف عن مفاجآت من العيار التقيل والحكومة المصرية الحقيقة قدمت الحكومة حزمة من المحفزات لجذب مستثمرين جدد ومساعدة الشركات الدولية على استئناف أنشطة الإنتاج والبحث والاستكشاف والتعجيل بها بأقصى سرعة والتوسع في برامج طرح المزايدات ومناطق الاستثمار الجديدة عبر بوابة مصر للاستكشاف ودا بعد سداد اغلب المستحقات المتأخرة للشركات دي والسماح ليه ببيع جزء من الإنتاج في السوق الخارجي.
طبعا شركات البترول العالمية بتجري دلوقتي على السوق المصري للتنقيب عن الطاقة واستغلال الميزات اللي يتقدمها الدولة المصرية بجانب الموقع الجغرافي الفريد لمصر وقربها من خطوط التجارة الدولية وشبكة المواني واللوجستيات والطرق والمحاور والبنية الأساسية الحديثة اللي وفرت ميزات كتير للشركات العالمية وسهلت عمليات الاستثمار وقررت تضخ استثمارات جديدة في السوق المصري وعلى سبيل المثال شركة كايرون بتروليم العالمية قررت زيادة إنتاجها من الزيت الخام والغاز الطبيعي في مصر بنسبة 33% بنهاية السنة الحالية وانتاج الشركة ارتفع من 20 ألف برميل يوميا مُعادل "زيت وغاز في عام 2020، إلى مستوى 120 ألف برميل مُعادل حاليًا وتعمل الشركة بشكل مباشر على زيادته إلى 160 ألف برميل يوميا بنهاية 2025 ودي زيادة كبيرة لشركة واحدة طبعا.
الجديد بقي والحدث الأهم في قطاع البترول والغاز هو اللي أعلنته "كايرون" وهي أنها شغالة دلوقتي في مرحلة استكشاف 3 بلوكات جديدة في مناطق امتياز الصحراء الغربية لتعظيم إنتاجها من الزيت والغاز الطبيعي بالتنسيق مع هيئة البترول المصرية والشركة القابضة للغاز ايجاس ودا بعد خطة الحكومة لاستعادة نسب إنتاج الزيت الخام والغاز الطبيعي السابقة من خلال زيادة برامج الاستكشاف والتنمية بمناطق الامتياز البرية والبحرية الواقعة تحت مظلة عمل الشركاء الأجانب وكمان الشركة العالمية بتستهدف دلوقتي حفر 7 آبار استكشافية خلال العام الحالي منهم 6 آبار بالصحراء الغربية بجانب عدد من الآبار التنموية لرفع الإنتاج بشكل عام من الزيت والغاز.
كمان الشركة أعلنت ضخ 300 مليون دولار على مدار الشهور الباقية من السنة لتمويل خطط الحفر والاستكشاف والتنمية وإنه هيتم زيادة منصات الحفر في مناطق امتياز كايرون في مصر ومتوقع وصول الشركة إلى ذروة إنتاجها من الزيت والغاز خلال 2026، مقارنة بحجم الاتفاقيات الموقعة الفترة اللي فاتت مع الهيئة المصرية العامة للبترول واللي هتجني الشركة ثمارها السنة الجاية.
