أزمة جديدة تهدد المتقدمين لقرعة سكن كل المصريين.. يا ترى إيه الحكاية
مصر في الفترة اللي فاتت، اطلقت عدد كبير من الطروحات والمبادرات السكنية لتوفير السكن الملائم للمصريين، واهم اعلان سكن كل المصريين 5.. بس للاسف في حاجة حصلت هتزعل ناس كتيرة من الل قدموا.. وللاسف مش هياخذوا شقق في الاعلان.
مع بداية الفترة الرئاسية الجديدة واعادة تشكيل الحكومة برئاسة الدكتور مصطفي مدبولي، الدولة اهتمت جدا بمشروعات الإسكان وتقريبا بقينا كل يوم نشوف اعلان جديدة لطرح من وزارة الإسكان والمرافق العمرانية، عن طرح اراضي أو شقق سكنية سواء كانت فاخرة أو متوسطة أو حتي إسكان اجتماعي للمصريين لمواجهة الفقاعة العقارية اللي بقت موجودة حاليا في سوق العقارات في مصر، خصوصا ان اسعار العقارات في مصر بقي مبالغ فيها جدا واعلي بكثير من سعرها الحقيقي .
الإعلانات الإسكان المختلفة اللي اعلنت عنها الدولة ممثلة في وزارة الإسكان والمرافق العمرانية خلت اسعار العقارات في مصر تهدي بشكل كبير، خصوصا أن في نسبة كبير من الشعب المصري وجه الفلوس اللي كانت معاه للشراء في الإعلانات المطروحة من جانب الدولة سواء كانت اراضي أو اسكان متميز أو متوسط أو حتي إسكان اجتماعي، وبالتالي الاقبال علي شراء العقارات انخفض بشكل كبير، خصوصا أن الناس بتدور علي مكان مضمون وأمن تشتري منه الشقق وطبعا مفيش اضمن ولا احسن من القنوات الرسمية للدولة المصرية.
طيب اية الصدمة اللي حصلت في اعلان سكن كل المصريين 5 وليه نسبة كبيرة من اللي قدموا هيزعلوا؟.
إعلان سكن كل المصريين 5 واحد من اهم اعلانات الإسكان اللي الدولة اعلنت عنها في الفترة اللي فاتت، واللي كان عليها اقبال كبير جدا من الناس ووصل عدد الناس اللي سحبوا كراسات الشروط من مكاتب البريد لـ 762 ألف مواطن، سدد منهم 589 ألف مواطن مقدمات جدية الحجز واللي وصلت لـ30 الف لحجز الشقق السكنية في المدن و 20 الف لحجز الشقق السكنية في المحافظات، وسجل منهم علي الموقع الإسكان لصندوق الإسكان ورفعوا الأوراق والمستندات المطلوبة منهم 571 ألف مواطن.
صندوق الإسكان الإجتماعي بدأ يفرز في إوراق الناس اللي مقدمين لحجز الشقق السكنية من يوم 19 يناير اللي فاتت، ولحد دلوقتي اللجنة التابعة للصندوق انتهت من فرز ملفات 277 الف مواطن، ولكن للاسف مي عبد الحميد مدير صندوق الإسكان الإجتماعي اكدت أن نسبة غير المنطبق عليهم الشروط أكثر من المعتاد خصوصًا المواطنين اللي عندهم وحدات سكنية بالفعل، وبالتالي لا تنطبق عليهم شروط التقديم في الإعلان الحالي لسكن كل المصريين 5 .
مدير صندوق الإسكان الإجتماعي وجهت لجان الفرز بالعمل بنظام الشيفتات وعلي طوال ساعات اليوم؛ بهدف زيادة ساعات العمل علشان يفرزوا الأوراق والمستندات بتاع الناس اللي قدمت في الإعلان، ووجهت كمان بتوخي أقصى درجات الدقة والحيطة في فرز ملفات المواطنين المتقدمين علشان كل واحد ياخذ حقه بشكل كامل .
