نافورة استثمارات بمليارات الدولارات.. خطة الدولة للتوسع في مشروعات الاستثمار السياحي
مشروعات الاستثمار السياحي واحدة من الفرص الذهبية اللي الحكومة شغالة عليها حاليا وده بعد النجاح الكبير اللي حصل في مشروع رأس الحكمة.. ياتري اية المناطق اللي بتجهزها الدولة حاليا لطرحها علي المستثمرين.. واية اهداف الدولة من المشروعات دي.
الفترة اللي فاتت الحكومة اشتغلت في اكثر من طريق لتوفير موارد دولارية جديدة لخزينة الدولة المصرية من تقديم التسهيلات والتحفيزات اللازمة لدخول الاستثمارات ورؤوس الاموال الأجنبية للسوق المصري، وكمان تقديم كل التسهيلات المتاحة لاعادة النهوض واكتشاف الصناعات الجديدة، وفتح اسواق كتيرة للصادرات المصرية للنفاذ ودخول مختلف اسواق العالم، وبدء في تنفيذ خطة الاصلاح الاقتصادي وتوقيع عقود الشراكة مع القطاع الخاص لأدارة وتشغيل الشركات المملوكة للدولة المصرية بالتعاون مع صندوق النقد الدولي.
الخطوات اللي اخذتها الحكومة لتنفيذ خطة إطلاح الاقتصاد المصري تضمنت كمان تسهيل الاجراءات للقطاع الخاص للدخول في شراكة وادارة وبناء وتشغيل المشروعات المختلفة داخل مصر، وده بيحصل من خلال تخصيص الأراضي المميزة الموجودة علي الشؤاطي والمناطق اللي تصلح للاستثمار السياحي أو الصناعي لدخول رؤوس الأموال الأجنبية للاستثمار وبناء المشروعات الجديدة، وده بيحصل عن طريق سحب الأراضي من الموجودين عليها سواء كانوا عليها بوضع اليد أو الملكية وتعويضهم بمناطق تانية مميزة، بهدف استغلال المناطق المطلوبة لاقامة مشروعات استثمارية وسياحية وصناعية هتكون باب جديد للدولة المصرية لدخول إيرادات جديدة للناتج القومي المصري، وكمان هتستوعب ايدي عاملة كتيرة من السوق المحلي علشان تشغل المشروعات دي وتعمرها.
الدولة بدأت أول خطوات الاستثمار في تخصيص الأراضي بتوقيع صفقة الاستثمار السياحي في راس الحكمة مع الأمارات، والصفقة دي كان لها مفعول السحر علي الاقتصاد المصري خصوصا أنها تعتبر السبب الاساسي في استقرار السياسة المالية في مصر حاليا، خصوصا أن وقت توقيع العقود كانت مصر بتعاني بشكل كبير جدا من نقص العملات الأجنبية في البنك المركزي والبنوك الوطنية ، وكانت السوق السودا في التجارة بالعملات عبارة عن نار بتهدد الاقتصاد المصري بشكل كامل، وبعد توقيع عقود الصفقة الامور تغيرت 180 درجة والعملات الدولارية بقت موجودة ومتاحة قدام الموردين والمستوردين خصوصا أن الصفقة دي دخلت للخزينة المصرية ايرادات وصلت لـ35 مليار دولار بشكل مباشر ، وكمان كانت السبب في تشغيل عدد كبير من الأيدي العاملة في مصر.
طيب ازاي مصر بتفكر في تطوير والتوسع في مشروعات الاستثمار السياحي في مصر ؟.
الدكتور مصطفي مدبولي رئيس مجلس الوزراء، قال أن الحكومة عندها خطة للتوسع في صفقات الاستثمار السياحي في مصر، والحكومة حاليا بتجهز 4 أو 5 مناطق لطرحهم للاستثمار السياحي بالشراكة مع القطاع الخاص علي غرار اللي حصل في رأس الحكمة، وخطة المناطق اللي هيتم طرحها في الفترة اللي جاية بتشمل منطقة راس بناس ورأس جميلة وعدد تاني من المناطق الحكومة شغالة حاليا علي تجهيزه لطرحه قدام القطاع الخاص.
