مصر والسعودية هيعملوا قلبان في المنطقة.. استثمارات بمليارات الدولارات ومشروعات هتغير شكل الخريطة
ايه هو مستقبل الاستثمارات السعودية في مصر، هل هي مرشحة للزيادة خلال الفترة الجاية ولا هتفضل زي ما هي، وإيه هي المجالات اللي المملكة بتستثمر فيها داخل مصر، والفترة الجاية هيحصل فيها إيه في الملف ده..
في السنين الأخيرة، حصل تقارب اقتصادي كبير جدا بين مصر والسعودية، واترجم التقارب ده في حجم الاستثمارات والتبادل التجاري بين البلدين اللي شهد طفرة كبيرة.
ونقدر نقول إن العلاقات المصرية السعودية بتشهد تنامي كبير في الفترة الأخيرة، وده بسبب حرص قيادتي الدولتين على تعزيز الشراكة الاقتصادية والاستراتيجية المشتركة بين البلدين، وتحقيق التكامل الصناعي، خاصة وأننا بنستهدف تكامل التنمية وتعظيم الإمكانيات، خاصة مع وجود توجهات سعودية بزيادة حجم استثماراتها في مصر.
وفي الحقيقة، الشهور الأخيرة شهدت وجود توجهات من ولي العهد السعودي لصندوق الاستثمارات العامة السعودي بضخ استثمارات بنحو 5 مليار دولار في مصر كمرحلة أولى، ومتوقع إن الفترة الجاية تشهد ضخ المزيد من الاستثمارات السعودية في مصر، خاصة في قطاع الصناعة، وده هيحصل بعد تأسيس المجلس التنسيقي بين مصر والسعودية وبعد توقيع اتفاقية حماية وتشجيع الاستثمارات المصرية السعودية.
طبعا كل ده هيفتح الباب قدام الشركات السعودية عشات تضخ حوالي 15 مليار دولار خلال 3 سنين جاية في مصر، وده هيحصل بالتزامن مع الجهود المبذولة للحكومة المصرية لحل مشاكل المستثمرين السعوديين.
وبلغة الأرقام، فوصل حجم الاستثمارات السعودية في مصر، اللي موجودة في شركات القطاع الخاص السعودي، ل 35 مليار دولار، أما الشركات التابعة لصندوق الاستثمار السيادي السعودي فوصل حجم استثماراتها ل 3 مليار دولار، وده لأن فب حوالي 7400 شركة سعودية، شغالة في مصر، وكمان 6500 شركة مصرية شغالة في السعودية.
ومن ضمن مشروعات الشراكة الاقتصادية كمان، هو مشروع الربط الكهربائي بين مصر والسعودية، واللي بيعتبر من أكبر المشروعات في الشرق الأوسط، وبيهدف لتبادل 3 جيجاوات من الطاقة الكهربائية بعد اكتمال مراحله السنة الجاية، عشان كده متوقع إن يتم بدء التشغيل التجريبي للمرحلة الأولى لخط الربط الكهربائي مع السعودية في شهر أبريل القادم.
كمان، متوقع إن المملكة تحول ودايعها الموجودة في مصر واللي بتقدر بحوالي 10.3 مليار دولار لاستثمارات مباشرة عشان تضخ في شرايين الاقتصاد المصري خلال الفترة الجاية.
غير كل ده، فمصر برضو بتعتبر سوق واعد وبتتمتع بالعديد من الموارد الطبيعية والمواد الخام وتوافر الأيدي العاملة والطاقة والحوافز الاستثمارية والمناطق الاقتصادية، وده ساهم في زيادة حجم التبادل التجاري بين مصر والسعودية خلال أول 8 أشهر من السنة اللي فاتت 2024 ل 6.5 مليار دولار، مقابل 4.9 مليار دولار خلال نفس الفترة من سنة 2023، بزيادة وصلت ل 32.7%.
وفي الفترة الأخيرة، بتستهدف الدولتين زيادة حجم التبادل التجاري بينهم ل 8.137 مليار دولار خلال السنة دي 2025، عشان كده في تحرك قوي من البلدين لتحقيق الشراكة والتكامل الصناعي في عدد من الصناعات، زي صناعة الأدوية والسيارات والثروة المعدنية والصناعات الغذائية وغيرها، عشان ترسم الشراكات المصرية السعودية مستقبل أفضل لاقتصاد البلدين.
