مشروع سعودي بريطاني هيقلب الموازين في مصر.. إيه حكايته وهيتعمل فين؟
يا ترى إزاي مصر قدرت توقع اتفاقية بـ7 مليار دولار مع شركة "شارد" الإنجليزية لإنشاء مجمع بتروكيماويات في العلمين الجديدة؟ وإيه أهمية المشروع ده للاقتصاد المصري؟
في خطوة كبيرة لتعزيز قطاع البتروكيماويات.. وقعت مصر اتفاقية إطارية مع شركة "شارد كابيتال" الإنجليزية ومجموعة القحطاني السعودية لإنشاء مجمع بتروكيماويات في مدينة العلمين الجديدة باستثمارات تصل لـ7 مليار دولار.
الاتفاقية دي تم توقيعها خلال فعاليات مؤتمر ومعرض مصر الدولي للطاقة "إيجبس 2025"، بحضور وزير البترول والثروة المعدنية، المهندس كريم بدوي، والسفير البريطاني في القاهرة، جاريث بايلي، ورئيس شركة "شارد كابيتال"، جيمس لويس، والرئيس التنفيذي لمجموعة القحطاني، الشيخ عبد الهادي طارق القحطاني.
طب إيه هو مجمع البتروكيماويات ده؟
المجمع ده هيكون واحد من أكبر المشروعات في قطاع البتروكيماويات بمصر.. هيتم إنشاؤه في مدينة العلمين الجديدة على مساحة 1600 فدان.. وهيهدف لإنتاج حوالي 6 مليون طن سنويًا من المنتجات البتروكيماوية والكيماوية المتخصصة.. واللي مش بننتجها حاليا في مصر.. وده معناه إننا هنقلل من استيراد المنتجات دي، ونوفر العملة الصعبة ونحقق اكتفاء ذاتي في الصناعات دي.
وإيه الفايدة اللي هتعود على الاقتصاد المصري؟
انشاء مجمع كبير زس ده وباستثمارات ضخمة ليه فوايد كبيرة على الاقتصاد المصري.. المشروع أولا هيستغل الموارد الطبيعية المتاحة في مصر.. زي الغاز الطبيعي لإنتاج منتجات بتروكيماوية عالية القيمة بدل ما نصدر المواد الخام ونستورد المنتجات النهائية.
كمان من خلال إنتاج وتصدير المنتجات دي هتزيد العائدات من العملة الصعبة وده هيدعم الاحتياطي النقدي ويقوي الجنيه المصري.. والمجمع هيوفر آلاف فرص العمل المباشرة وغير المباشرة.. سواء أثناء مرحلة الإنشاء أو التشغيل.. وده هيساهم في تقليل معدلات البطالة وتنمية المهارات المحلية.
والمشروع وفقا للمعلومات المتوفرة عنها هيكون نواة لجذب استثمارات تانية للمنطقة وهيحول العلمين الجديدة لمركز صناعي واقتصادي مهم بجانب كونها وجهة سياحية.
ده غير ان المجمع هيتبنى أحدث التكنولوجيات اللي بتضمن الاستدامة البيئية والكفاءة.. وده معناه تقليل الانبعاثات والحفاظ على البيئة.. بما يتماشى مع المعايير العالمية.
وإيه اللي بيميز المشروع ده عن غيره؟
الميزة الكبيرة في المشروع ده هي الشراكة الدولية… التعاون مع "شارد كابيتال" الإنجليزية ومجموعة القحطاني السعودية بيعكس الثقة العالمية في الاقتصاد المصري وبيئة الاستثمار فيه.. كمان وجود مستثمرين أجانب بيساهم في نقل التكنولوجيا الحديثة والخبرات العالمية.. وده بيساعد في تطوير الصناعة المحلية ورفع كفاءتها.
وإيه الخطوات الجاية؟
بعد توقيع الاتفاقية الإطارية هتبدأ مرحلة الدراسات التفصيلية والتصميمات الهندسية بعدها على طول مرحلة الإنشاءات.. و من المتوقع إن المشروع ياخد عدة سنوات لحد ما يبدأ التشغيل الفعلي لكن العوائد المتوقعة تستحق الاستثمار والانتظار.
وخد بالك من حاجة مهمة.. المشروع ده بيمثل خطوة استراتيجية نحو تعزيز مكانة مصر في صناعة البتروكيماويات على المستوى الإقليمي والدولي.. وبيساهم بشكل كبير في دعم الاقتصاد الوطني وتحقيق التنمية المستدامة.
