لو عايز عربية.. شوف شروط الاستفادة من مبادرة سيارات المصريين بالخارج
يا ترى إيه هي فوايد المبادرة اللي أطلقتها الحكومة المصرية لسيارات المصريين بالخارج، هل هي مخصصة لفئة معينة، ولا مسموح لأي مواطن مصري الاستفادة منها، وإيه هي المزايا بتاع المبادرة دي ووجه الاستفادة منها.
في الفترة الأخيرة، الحكومة المصرية أطلقت مبادرة سيارات المصريين بالخارج، عشان تسهل على المواطنين المصريين المقيمين في الخارج، عشان يقدروا يشتروها من بره ويدخلوها مصر بكل سهولة.
كمان، الحكومة بتقدم مزايا كبيرة للراغبين في شحن السيارات لمصر، وبتكون بدون دفع رسوم جمركية، ودي بتيجي ضمن مبادرة "سيارات المصريين بالخارج"، واللي بتعتبر فرصة للمسافرين عشان ياخدوا عربيات حديثة وبأسعار منافسة، وكمان ممكم يستفيد منها المشترك لمدة 5 سنين.
طب إيه هي شروط دخول السيارات ضمن المبادرة؟
بص يا سيدي، وزارة المالية فعلا حطت مجموعة من الشروط للاستفادة من مبادر دخول السيارات من الخارج بالنسبة للمصريين في الخارج، وهي: إن يكون الشخص الراغب في شراء السيارة وشحنها إلى مصر لا يقل عمره عن 16 سنة، ويكون قادر على إدارة عملية الاستيراد بشكل قانوني.
كمان، لازم تكون العربية المستوردة تم تصنيعها في عام 2019 أو في السنوات التالية لحد عام 2025، وبيسمح للمستفيدين بسداد 30% فقط من قيمة الضريبة الجمركية عند استيراد السيارة.
لازم كمان، يكون الشخص مقيم في الخارج وعنده إقامة قانونية سارية، وعلى المتقدمين تقديم كشف حساب بنكي يغطي فترة 6 أشهر سابقة على تاريخ تحويل المبلغ.
ومفروض يتم سداد 30% بس من قيمة الضريبة الجمركية عند استيراد السيارة، على أن يتم استرداد المبلغ ده بعد مرور 5 سنين، وخلي بالك مش من حق أي شخص استفاد من المبادرة دي قبل كده، إنه يقدم مرة تانية.
وحاليا، بيتم طرح استمارة خاصة للتسجيل للمصريين بالخارج، وهي خاصة بأصحاب الطلبات والحالات المسجلين في التطبيق بالمبادرة.
والاستمارة دي بتطلب تسجيل مجموعة من البيانات المهمة، واللي في مقدمتها الاسم والرقم القومى ورقم التواصل والايميل ، وكمان رقم التسجيل بالتطبيق الخاص بالمبادرة، والدولة المقيم به.
ومؤخرا، وصل عدد المصريين المسجلين على منصة مبادرة "سيارات المصريين بالخارج" عشان ياخدوا عربية للاستخدام الشخصي بدون رسوم جمركية، ل 589 ألف و724 مصري بالخارج، من يوم إطلاق المبادرة، ووصل إجمالي قيمة أوامر الدفع الصادرة للمستفيدين من المبادرة، مليار و976 مليون و737 ألف و388 دولار، ووصل إجمالي التحويلات اللي تمت ل 799 مليون و462 ألف و490 دولار لحد دلوقتي.
وببساطة، الأرقام دي بتكشف قد إيه المبادرة دي ناجحة، وهتقدر تحقق أهدافها في خدمة المصريين بالخارج من ناحية، وكمان تعظيم الإيرادات الاقتصادية من المبادرة دي من ناحية تانية.
